കൊച്ചി: സംസ്ഥാന സര്‍ക്കാരിന് വേണ്ടി കേരള സാഹിത്യ അക്കാദമി ശ്രീകുമാരന്‍ തമ്പിയെക്കൊണ്ട് എഴുതിച്ച കേരളഗാനം താന്‍ കണ്ടിട്ടേയില്ലെന്ന് സെലക്ഷന്‍ കമ്മിറ്റി അംഗം എം. ലീലാവതി അറിയിച്ചു. ഇതുമായി ബന്ധപ്പെട്ട് ഒരു യോഗത്തിലും പങ്കെടുത്തിട്ടില്ലെന്നും അവര്‍ വ്യക്തമാക്കി.
ശ്രീകുമാരന്‍ തമ്പിയുടെ ഗാനം സമിതിയിലെ ആര്‍ക്കും അംഗീകരിക്കാനായില്ലെന്നും അതിനാല്‍ ലീലാവതി അടങ്ങുന്ന സമിതി ഗാനം വേണ്ടെന്ന് വച്ചുവെന്നുമായിരുന്നു സാഹിത്യ അക്കാദമി പ്രസിഡന്റ് കെ. സച്ചിദാനന്ദന്‍ കഴിഞ്ഞ ദിവസം പറഞ്ഞത്. എന്നാല്‍ സമിതിയിലെ അംഗമായ ലീലാവതി ടീച്ചറുടെ വെളിപ്പെടുത്തല്‍ ഇതിന് വിരുദ്ധമാണ്.
‘ശ്രീകുമാരന്‍ തമ്പി എഴുതിയ പാട്ട് ഞാന്‍ കണ്ടിട്ടില്ല. അനാരോഗ്യത്തെ തുടര്‍ന്ന് യോഗത്തിന് പോകാന്‍ കഴിഞ്ഞിരുന്നില്ല. ഞാന്‍ പാട്ട് കണ്ടിട്ടില്ലെന്ന കാര്യം സച്ചിദാനന്ദന്‍ അടക്കമുള്ളവര്‍ക്ക് അറിയാമല്ലോ? ‘ എന്നായിരുന്നു ലീലാവതിയുടെ പ്രതികരണം.
താന്‍ അപമാനിതനായെന്ന ശ്രീകുമാരന്‍ തമ്പിയുടെ തുറന്നുപറച്ചില്‍ വന്നതോടെ, സെലക്ഷന്‍ കമ്മിറ്റിയാണ് പാട്ട് നിരാകരിച്ചതെന്നായിരുന്നു സച്ചിദാനന്ദന്റെ പ്രതികരണം. കവി എന്ന നിലയില്‍ അദ്ദേഹമെഴുതിയ പാട്ട് വളരെ നന്നായിട്ടാണ് എനിക്ക് തോന്നിയത്. എന്നാല്‍ കമ്മിറ്റിയിലുണ്ടായിരുന്ന ആര്‍ക്കും തന്നെ പാട്ട് സ്വീകാര്യമായിരുന്നില്ല.
എം ലീലാവതി, എം.ആര്‍. രാഘവ വാര്യര്‍ എന്നിവര്‍ അടക്കമാണ് കമ്മിറ്റിയിലുണ്ടായിരുന്നത്. അംഗീകാരയോഗ്യമായ പാട്ടാണെന്ന് അവരാര്‍ക്കും തോന്നിയിരുന്നില്ല. ക്ലീഷെയും പഴകിയതുമായ പ്രയോഗങ്ങള്‍ ആയതിനാലാണ് തള്ളിയത്. തിരുത്തലിന് ശ്രീകുമാരന്‍ തമ്പി തയാറായില്ല, തുടര്‍ച്ചയായ വിവാദങ്ങള്‍ക്ക് പിന്നില്‍ ചില ശക്തികളുണ്ടോയെന്ന് സംശയിക്കുന്നു, സച്ചിദാനന്ദന്‍ പറഞ്ഞു.
കേരളഗാനം എഴുതിച്ച ശേഷം സാഹിത്യ അക്കാദമി ഒരു മറുപടിയും നല്കിയില്ലെന്ന് ശ്രീകുമാരന്‍ തമ്പി ആരോപിച്ചിരുന്നു. ഇതിന് മറുപടിയായാണ് സച്ചിദാനന്ദന്റെ പ്രതികരണം. എന്നാല്‍ സമിതിയിലുണ്ടെങ്കിലും ശ്രീകുമാരന്‍ തമ്പി എഴുതിയ പാട്ട് കേട്ടിട്ടില്ലെന്ന് വെളിപ്പെടുത്തിയിരിക്കുകയാണ് എം. ലീലാവതി.
പ്രതികരിക്കാൻ ഇവിടെ എഴുതുക: