മതവികാരം വ്രണപ്പെടുത്തുന്ന രംഗങ്ങളെ ചൊല്ലിയുളള വിവാദത്തെ തുടര്‍ന്ന നയന്‍താരയുടെ ഏറ്റവും പുതിയ തമിഴ് ചിത്രം ‘അന്നപൂര്‍ണി’ നീക്കം ചെയ്ത് ഒടിടി പ്ലാറ്റ്ഫോമായ നെറ്റ്ഫ്‌ലിക്‌സ്. ചിത്രത്തില്‍ മതവികാരം വ്രണപ്പെടുത്തുന്ന രംഗങ്ങളുണ്ടെന്ന് ആരോപിച്ച് ഹൈന്ദവ സംഘടനകള്‍ പരാതി നല്‍കിയതിനെ തുടര്‍ന്നാണ് നടപടി.
സിനിമയുടെ നിര്‍മ്മാതാക്കളായ ‘സീ സ്റ്റുഡിയോ’ വിശ്വഹിന്ദു പരിഷത്തിന് ക്ഷമാപണ കത്തും കൈമാറി. ഈ മാസം 8 ന് നയന്‍താര, ജയ്, എഴുത്തുകാരനും സംവിധായകനുമായ നിലേഷ് കൃഷ്ണ, നിര്‍മ്മാതാക്കളായ ജതിന്‍ സേത്തി, ആര്‍ രവീന്ദ്രന്‍, പുനിത് ഗോയങ്ക, സീ സ്റ്റുഡിയോയുടെ ചീഫ് ബിസിനസ് ഓഫീസര്‍ ഷാരിഖ് പട്ടേല്‍, നെറ്റ്ഫ്‌ലിക്‌സ് ഇന്ത്യ മേധാവി മോണിക്ക ഷെര്‍ഗില്‍ എന്നിവര്‍ക്കെതിരെ എഫ്ഐആര് ഫയല്‍ ചെയ്തിരുന്നു. ഹിന്ദു ഐ ടി സെല്‍ സ്ഥാപകന്‍ രമേഷ് സോളങ്കി എന്നയാള്‍ നല്‍കിയ പരാതിയിലാണ് മുംബൈയില്‍ എഫ്ഐആര് രജിസ്റ്റര്‍ ചെയ്തത്.
ബ്രാഹ്മണ കുടുംബത്തില്‍ ജനിച്ച പെണ്‍കുട്ടി (നയന്‍താര) ലോകത്തിലെ ഏറ്റവും മികച്ച ഷെഫ് ആയി മാറുന്നതാണ് ചിത്രത്തിന്റെ കഥ. മാംസം കഴിക്കാനും പാകം ചെയ്യാനുമുള്ള നായികയുടെ തീരുമാനവും മുസ്ലീം കഥാപാത്രവുമായുള്ള (ജയ്) സൗഹൃദവും ഹിന്ദു ദൈവമായ രാമന്‍ മാംസം ഭക്ഷിച്ചുവെന്ന സൂചിപ്പിക്കുന്ന സംഭാഷണവും ഹിന്ദു മതവികാരം വ്രണപ്പെടുത്തിയെന്നാണ് പരാതി.
ശ്രീരാമന്‍ വനവാസ സമയത്ത് മാംസാഹാരം കഴിച്ചയാളാണെന്ന് ജയുടെ കഥാപാത്രം പറയുന്നുണ്ട്. ചിത്രത്തില്‍ വാല്മീകി രാമായണത്തെ തെറ്റായി ചിത്രീകരിക്കുകയും ശ്രീരാമനെ വിമര്‍ശിക്കുകയും ചെയ്തുവെന്നും ഹിന്ദു ഐടി സെല്‍ മുംബയ് പൊലീസില്‍ നല്‍കിയ പരാതിയില്‍ പറയുന്നു.
ഡിസംബര്‍ ഒന്നിനാണ് ചിത്രം തിയറ്ററുകളില്‍ റിലീസ് ചെയ്തത്.ഡിസംബര്‍ 29 നാണ് നെറ്റ്ഫ്‌ലിക്‌സ് സംപ്രേഷണം ചെയ്ത് തുടങ്ങിയത്.
പ്രതികരിക്കാൻ ഇവിടെ എഴുതുക: