നവിമുംബൈ: നാട്ടിലെത്തിയ ഓസ്‌ട്രേലിയന്‍ വനിതാ ടീമിനെതിരായ ട്വന്റി20 പരമ്പരയില്‍ ഭാരതത്തിന് വിജയത്തുടക്കം. നവി മുംബൈയില്‍ നടന്ന മത്സരത്തില്‍ ഒമ്പത് വിക്കറ്റിന്റെ തകര്‍പ്പന്‍ ജയമാണ് ഭാരതം സ്വന്തമാക്കിയത്. ഓസ്‌ട്രേലിയ മുന്നില്‍വച്ച 142 റണ്‍സിന്റെ വിജയലക്ഷ്യത്തില്‍ ഭാരതം 2.2 ഓവര്‍ ബാക്കിനില്‍ക്കെ എത്തിച്ചേര്‍ന്നു.
ഭാരതത്തിനായി ഷെഫാലി വര്‍മ(പുറത്താകാതെ 64)യും സ്മൃതി മന്ദാന(54)യും അര്‍ദ്ധസെഞ്ചുറി നേടി. ജമീമ റോഡ്രിഗസ്(ആറ്) പുറത്താകാതെ നിന്നു. നേരത്തെ ഭാരതത്തിന്റെ മീഡിയം പേസര്‍ ടിറ്റസ് സാധു നാല് വിക്കറ്റ് നേടി ഓസീസിനെ പുറത്താക്കുന്നതിന് മുന്നില്‍ നിന്ന് പട നയിച്ചു. തകര്‍ന്നുവീണ ഓസീസ് നിരയെ ഫോബെ ലിച്ച്ഫീല്‍ഡിന്റെ(49)യും എല്ലിസെ പെറി(37)യുടെയും ബാറ്റിങ് മികവാണ് പൊരുതാവുന്ന സ്‌കോറെങ്കിലും നേടാന്‍ പ്രാപ്തമാക്കിയത്.
പ്രതികരിക്കാൻ ഇവിടെ എഴുതുക: