പത്തനംതിട്ട: ശബരിമല ധര്‍മ്മ ശാസ്താവിന് മണ്ഡലപൂജയ്‌ക്ക് ചാര്‍ത്താനുള്ള തങ്കഅങ്കിയും വഹിച്ചു കൊണ്ടുള്ള ഘോഷയാത്ര ആറന്മുള പാര്‍ത്ഥസാരഥി ക്ഷേത്ര സന്നിധിയില്‍നിന്ന് പുറപ്പെട്ടു. രാവിലെ ഏഴിന് തങ്കഅങ്കി ആറന്മുള ക്ഷേത്രത്തില്‍ നിന്ന് പുറത്തേക്ക് എടുത്തു. തിരുവിതാംകൂര്‍ ദേവസ്വം ബോര്‍ഡ് പ്രസിഡന്റ് പി.എസ്. പ്രശാന്ത്, ജില്ലാ കളക്ടര്‍ എ. ഷിബു, ജില്ലാ പോലീസ് മേധാവി വി. അജിത്ത്, ദേവസ്വം ബോര്‍ഡ് അംഗങ്ങളായ ജി. സുന്ദരേശന്‍, അഡ്വ.എ. അജികുമാര്‍, ദേവസ്വം സെക്രട്ടറി ജി. ബൈജു, ദേവസ്വം കമ്മിഷണര്‍ സി.എന്‍. രാമന്‍ തുടങ്ങിയര്‍ പങ്കെടുത്തു.
വിവിധ സ്ഥലങ്ങളില്‍ സ്വീകരണം ഏറ്റുവാങ്ങി ഇന്നലെ രാത്രി ഓമല്ലൂര്‍ ക്ഷേത്രത്തിലും നാളെ കോന്നി മുരിങ്ങമംഗലത്തും 25ന റാന്നി പെരുന്നാട് ക്ഷേത്രത്തിലും വിശ്രമിക്കും. തങ്കയങ്കി ഘോഷയാത്ര 26ന് ഉച്ചയോടെ പമ്പയില്‍ എത്തിച്ചേരും. അവിടെ വിശ്രമിച്ച ശേഷം സന്നിധാനത്തേക്ക് തിരിക്കുന്ന ഘോഷയാത്ര വൈകുന്നേരം 5.30ന് ശരംകുത്തിയില്‍ എത്തിച്ചേരും.
ശരംകുത്തിയില്‍ ദേവസ്വം ബോര്‍ഡ് നല്‍കുന്ന ഔദ്യോഗിക സ്വീകരണത്തിനു ശേഷം 6.15ന് തങ്ക അങ്കി പേടകം ശബരിമല അയ്യപ്പ സന്നിധിയില്‍ എത്തിക്കും. കൊടിമരച്ചുവട്ടിലും തങ്ക അങ്കിക്ക് വരവേല്‍പ്പ് നല്‍കും. 6.30ന് തങ്കയങ്കി ചാര്‍ത്തിയുള്ള മഹാദീപാരാധന നടക്കും. 27നാണ് തങ്കഅങ്കി ചാര്‍ത്തിയുള്ള മണ്ഡലപൂജ. 10.30 നും 11.30 നും
മദ്ധ്യേയാണ് മണ്ഡല പൂജ നടക്കുക. 27ന് രാത്രി അടക്കുന്ന ക്ഷേത്രനട 30ന് വൈകിട്ട് അഞ്ചിനു മകരവിളക്ക് ഉത്സവത്തിനായി വീണ്ടും തുറക്കും.
പ്രതികരിക്കാൻ ഇവിടെ എഴുതുക: