ധോണിയെ മറികടന്ന് സൂര്യകുമാര്‍

ക്യബേറ: ടി 20 ക്രിക്കറ്റില്‍ മഹേന്ദ്ര സിങ് ധോണിയെ മറികടന്ന് സൂര്യകുമാര്‍ യാദവ്. ടി20യില്‍ ദക്ഷിണാഫ്രിക്കയില്‍ ഉയര്‍ന്ന വ്യക്തിഗത സ്‌കോര്‍ നേടുന്ന ഭാരത നായകനായി സൂര്യകുമാര്‍ യാദവ്. ഇക്കാര്യത്തില്‍ മുന്‍ നായകന്‍ എം.എസ്. ധോണിയെയാണ് സൂര്യ മറികടന്നത്. 2007ല്‍ ധോണി നേടിയ 45 റണ്‍സാണ് പഴങ്കഥയായത്. അതേവര്‍ഷം, ധോണി നേടിയ 36 റണ്‍സ് മൂന്നാം സ്ഥാനത്തായി. ദീര്‍ഘകാലം ഭാരത ക്യാപ്റ്റനായിരുന്ന വിരാട് കോഹ്‌ലി, രോഹിത് ശര്‍മ എന്നിവര്‍ക്കൊന്നും ഇടം നേടാനായില്ലെന്നുള്ളത് സൂര്യയുടെ ഇന്നിങ്സിന്റെ മാറ്റ് വര്‍ധിപ്പിക്കുന്നു.

കൂടാതെ ദക്ഷിണാഫ്രിക്കയ്‌ക്കെതിരെ ടി20 മത്സരങ്ങളില്‍ ഏറ്റവും കൂടുതല്‍ അര്‍ധ സെഞ്ചുറി നേടുന്ന താരങ്ങളില്‍ ഒരാളായിരിക്കുകാണ് സൂര്യകുമാര്‍. നാല് തവണ അദ്ദേഹം അര്‍ധസെഞ്ചുറി കടന്നു. കളിച്ചതാവട്ടെ അഞ്ച് ഇന്നിങ്സുകള്‍ മാത്രവും. സൂര്യ ദക്ഷിണാഫ്രിക്കയക്കെതിരെ ആദ്യ ഇറങ്ങിയ മത്സരത്തില്‍ 33 പന്തില്‍ പുറത്താവാതെ 50 റണ്‍സാണ് നേടിയത്. രണ്ടാം ടി20യില്‍ 22 പന്തില്‍ 61. മൂന്നാമത് കളിച്ചപ്പോള്‍ എട്ട് റണ്‍സിന് പുറത്തായി. നാലാം മത്സരത്തില്‍ 40 പന്തില്‍ 68 റണ്‍സെടുക്കാനും സാധിച്ചു. കഴിഞ്ഞ ദിവസം 56 റണ്‍സും.

ദക്ഷിണാഫ്രിക്കയ്‌ക്കെതിരെ ജോണി ബെയര്‍സ്റ്റോ (ഇംഗ്ലണ്ട്), മുഹമ്മദ് റിസ്വാന്‍ (പാകിസ്ഥാന്‍), ഡേവിഡ് വാര്‍ണര്‍ (ഓസ്ട്രേലിയ) എന്നിവരാണ് നാല് അര്‍ധ സെഞ്ചുറി വീതം നേടിയ താരങ്ങള്‍. 13 ഇന്നിങ്സില്‍ നിന്നാണ് ബെയര്‍സ്റ്റോയുടെ നേട്ടം. റിസ്വാന് വേണ്ടി വന്നത് 11 ഇന്നിങ്സ്. വാര്‍ണര്‍ 15 ഇന്നിങ്സുകള്‍ കളിച്ചു. ഇന്ന് നടക്കുന്ന മൂന്നാം ടി20യില്‍ സൂര്യക്ക് അര്‍ധ സെഞ്ചുറി നേടാന്‍ കഴിഞ്ഞാല്‍ മൂവരേയും മറികടക്കാന്‍ സാധിക്കും.

ടി 20യില്‍ 2000 റണ്‍സും സൂര്യകുമാര്‍ യാദവ് പിന്നിട്ടു. 56 ഇന്നിംഗ്‌സില്‍ നിന്ന് 2041 റണ്‍സാണ് സൂര്യയുടെ സമ്പാദ്യം. ഇതില്‍ മൂന്ന് സെഞ്ചുറികളും 17 അര്‍ധ സെഞ്ചുറികളും ഉള്‍പ്പെടും. 44.37 ശരാശരിയിലും 171.22 സ്‌ട്രൈക്ക് റേറ്റിലുമാണ് സൂര്യ ഇത്രയും റണ്‍സ് അടിച്ചെടുത്തത്. ഭാരതത്തിന് വേണ്ടി ടി20യില്‍ ഏറ്റവും കൂടുതതല്‍ റണ്‍സ് നേടുന്ന താരങ്ങളില്‍ നാലാമതെത്താനും സൂര്യകുമാറിന് സാധിച്ചു. ഇക്കാര്യത്തില്‍ വിരാട് കോഹ്‌ലിയാണ് ഒന്നാമന്‍. 107 ഇന്നിങ്സില്‍ നിന്ന് 4008 റണ്‍സാണ് കോഹ്‌ലിയുടെ സമ്പാദ്യം. രോഹിത് ശര്‍മ രണ്ടാം സ്ഥാനത്ത്. 140 ഇന്നിങ്സുകളില്‍ ബാറ്റ് ചെയ്തിട്ടുള്ള രോഹിത് ഇതുവരെ 3853 റണ്‍സ് നേടി. 68 ഇന്നിങ്സില്‍ 2256 റണ്‍സ് നേടിയ കെ.എല്‍. രാഹുല്‍ മൂന്നാമതുണ്ട്.

ഏറ്റവും കുറഞ്ഞ ടി20 ഇന്നിങ്സുകളില്‍ 2000 മറിടക്കുന്ന താരങ്ങളുടെ പട്ടികയില്‍ വിരാട് കോഹ്‌ലിക്കൊപ്പമെത്താനും സൂര്യകുമാറിന് സാധിച്ചു. ഇരുവരും 56-ാം ഇന്നിങ്സിലാണ് 2000 പിന്നിട്ടത്. ഇക്കാര്യത്തില്‍ മുന്‍ പാകിസ്ഥാന്‍ ക്യാപ്റ്റന്‍ ബാബര്‍ അസം, അവരുടെ വിക്കറ്റ് കീപ്പര്‍ മുഹമ്മദ് റിസ്വാന്‍ എന്നിവരാണ് ഒന്നാം സ്ഥാനം പങ്കിടുന്നത്. 52 ഇന്നിംഗ്സിലാണ് ഇരുവരുടേയും നേട്ടം.