ന്യൂദല്‍ഹി : ചോദ്യത്തിന് പകരം കോഴ ആരോപണത്തില്‍ തെളിവില്ലാതെ തന്നെ ശിക്ഷിച്ചെന്ന് തൃണമൂല്‍ കോണ്‍ഗ്രസ് ലോക്‌സഭാംഗം മൊഹുവ മൊയ്ത്ര.ലോക്‌സഭയില്‍ നിന്ന് പുറത്താക്കിയതിലൂടെ തന്റെ നാവടക്കാനാവില്ലെന്നും മൊയ്ത്ര പറഞ്ഞു.
പാര്‍ലമെന്റ് അംഗത്വം റദ്ദാക്കപ്പെട്ടതിന് ശേഷം ആദ്യമായി പ്രതികരിക്കവെ രൂക്ഷ വിമര്‍ശനമാണ് മൊഹുവ മൊയ്ത്ര ഉയര്‍ത്തിയത്. തന്നെ പുറത്താക്കാന്‍ എത്തിക്‌സ് കമ്മിറ്റിക്ക് അധികാരമില്ല. ദര്‍ശന്‍ ഹിര നന്ദനിയുടെ വ്യവസായിക താല്‍പര്യത്തിന് വേണ്ടി ചോദ്യം ചോദിച്ചെന്നാണ് ആരോപണം. എന്നാല്‍ കോഴ വാങ്ങിയതിന് എത്തിക്‌സ് കമ്മിറ്റി റിപ്പോര്‍ട്ടില്‍ തെളിവില്ലെന്നും മഹുവ മൊയ്ത്ര പറഞ്ഞു.
അടുത്ത ആറുമാസം സിബിഐയെ ഉപയോഗിച്ച് തന്നെ വേട്ടയാടും. എന്തും നേരിടാന്‍ തയാറാണെന്നും അടുത്ത 30 വര്‍ഷം സഭയ്‌ക്ക് അകത്തും പുറത്തും പോരാട്ടം തുടരുമെന്നും മൊഹുവ മൊയ്ത്ര പ്രതികരിച്ചു.
മഹുവയുടേത് ഗുരുതര കുറ്റമാണെന്ന് കണ്ടെത്തിയ എത്തിക്‌സ് കമ്മിറ്റിയുടെ റിപ്പോര്‍ട്ട് ലോക്‌സഭ ശബ്ദവോട്ടോടെ പാസാക്കുകയായിരുന്നു.
പ്രതികരിക്കാൻ ഇവിടെ എഴുതുക: