അമ്പലപ്പുഴ: വീടിനുള്ളില്‍ തീപ്പൊള്ളലേറ്റ നിലയില്‍ കണ്ടെത്തിയ അമ്മയും, ഭിന്നശേഷിക്കാരനായ മകനും മരിച്ചു. അമ്പലപ്പുഴ ക്ഷേത്രത്തിന് കിഴക്കേനടയില്‍ മകം വീട്ടില്‍ പരേതനായ മണിയുടെ ഭാര്യ ശോഭ (60), മകന്‍ മഹേഷ് (33) എന്നിവരാണ് മരിച്ചത്. ഇന്നലെ ഉച്ചയോടെയാണ് സംഭവം.
റോഡിലൂടെ പോയ അമീര്‍ എന്ന യുവാവാണ് ഇവരുടെ മുറിക്കുളളില്‍ നിന്ന് തീയും പുകയും ഉയരുന്നത് കണ്ടത്. ഉടന്‍ തന്നെ ഇദ്ദേഹം മറ്റുള്ളവരെ വിളിച്ചുകൂട്ടി. ഈ സമയം ഇവിടെയെത്തിയ മോട്ടോര്‍ വാഹന വകുപ്പുദ്യോഗസ്ഥരും നാട്ടുകാരും ചേര്‍ന്ന് തുറന്നു കിടക്കുകയായിരുന്ന മുന്‍വാതിലിലൂടെ അകത്തു കയറിയപ്പോള്‍ മുറിയില്‍ മണ്ണെണ്ണയൊഴിച്ച് തീ കത്തിയ നിലയിലായിരുന്നു ഇരുവരും. ഉടന്‍ തന്നെ 108 ആംബുലന്‍സില്‍ ഇരുവരെയും ആലപ്പുഴ മെഡിക്കല്‍ കോളജ് ആശുപത്രിയിലെത്തിച്ചു. ഉച്ചയോടെ മഹേഷും വൈകിട്ടോടെ ശോഭയും മരിച്ചു. ആത്മഹത്യയെന്നാണ് സൂചന. ഇരുവരുടെയും മൃതദേഹങ്ങള്‍ മെഡിക്കല്‍ കോളജ് ആശുപത്രി മോര്‍ച്ചറിയില്‍. മഹേഷിന്റെ സഹോദരന്‍ മനോജ്.
പ്രതികരിക്കാൻ ഇവിടെ എഴുതുക: