സംസ്ഥാന സർക്കാരിനെതിരെ ആഞ്ഞടിച്ച് നിർമല സീതാരാമൻ; കേരളത്തിൽ നടക്കുന്നത് വ്യാജപ്രചരണങ്ങൾ, ആരോപണങ്ങളിൽ അക്കമിട്ട് മറുപടി

ആറ്റിങ്ങൽ: എജി വഴി കൃത്യമായ കണക്ക് സമർപ്പിച്ചാൽ മാത്രമേ ജിഎസ്ടി നഷ്ടപരിഹാരം നൽകാനാവൂവെന്ന് കേന്ദ്ര ധനമന്ത്രി നിർമല സീതാരാമൻ. ഇക്കാര്യം മാധ്യമങ്ങളോട് പറയുന്നത് യാഥാർത്ഥ്യം ജനങ്ങളെ അറിയിക്കാൻ വേണ്ടിയാണെന്നും ധനമന്ത്രി കൂട്ടിച്ചേർത്തു. തിരുവനന്തപുരത്തെ ആറ്റിങ്ങലിൽ വായ്പാ വ്യാപനമേള ഉദ്ഘാടനം ചെയ്ത് സംസാരിക്കുകയായിരുന്നു നിർമല സീതാരാമൻ.

സംസ്ഥാനങ്ങളുടെ കേന്ദ്ര വിഹിതത്തിനായി കൃത്യമായ പ്രപ്പോസൽ സമർപ്പിക്കാൻ ധനകാര്യ വകുപ്പിനോട് അവശ്യപ്പെട്ടിട്ടുണ്ട്. രണ്ട് തവണ ആവശ്യപ്പെട്ടെങ്കിലും മറുപടി നൽകിയില്ല. അത് കിട്ടാതെ എങ്ങനെ പണം നൽകാൻ കഴിയുമെന്നും മന്ത്രി ചോദിച്ചു. കേന്ദ്ര ഫണ്ട് സംബന്ധിച്ച് സംസ്ഥാനത്ത് തെറ്റായ പ്രചാരണം നടക്കുന്നുവെന്നും നിർമല സീതാരാമൻ വ്യക്തമാക്കി.

കേന്ദ്ര വിഹിതങ്ങൾ കിട്ടിയതിനുശേഷം കേരളം പദ്ധതികളുടെ പേര് മാറ്റുകയാണ്. കർഷകരുടെ ആത്മഹത്യയിൽ സംസ്ഥാനത്തിന് ഉത്തരവാദിത്വം ഉണ്ടെന്നും മന്ത്രി സൂചിപ്പിച്ചു. സംഭരിച്ച നെല്ലിന്റെ മുഴുവൻ‌ തുകയും നൽകേണ്ടത് സംസ്ഥാന സർക്കാരാണ്. എല്ലാ സംസ്ഥാനങ്ങൾക്കും കൃത്യസമയത്ത് പണം നൽകുന്നുണ്ട്. കേരളം കൃത്യമായ പ്രപ്പോസൽ നൽകിയില്ലെന്ന് നിർമലാ സീതാരാമൻ പറഞ്ഞു. രണ്ട് തവണ ആവശ്യപ്പെട്ടെങ്കിലും മറുപടി തന്നില്ലെന്നും നിർമല സീതാരാമൻ പറഞ്ഞു.

6015 കോടിയുടെ വായ്പ സഹായമാണ് തലസ്ഥാനത്തിന് അനുവദിച്ചിട്ടുള്ളത്. വിധവ- വാർധക്യ പെൻഷനുകൾക്ക് ആവശ്യമായ തുക നൽകുന്നില്ല എന്നാണ് പ്രചാരണം. എല്ലാ സംസ്ഥാനങ്ങൾക്കും കൃത്യമായ സമയത്ത് പണം നൽകുന്നുണ്ട്. ഒക്ടോബർ വരെയുള്ള എല്ലാ അപേക്ഷകൾക്കും ഉള്ള തുക നൽകിയിട്ടുണ്ടെന്നും മന്ത്രി വ്യക്തമാക്കി.