തിരുവനന്തപുരം: മന്ത്രി ആര്‍ ബിന്ദുവിന്റെ ഔദ്യോഗിക വസതിയിലേക്ക് നടത്തിയ പ്രകടനത്തിനിടെ മൂക്ക് ലാത്തി കൊണ്ടടിച്ച് പൊട്ടിച്ച പൊലീസുകാരനെതിരെ കെഎസ്യു നേതാവ് നസിയ മുണ്ടപ്പള്ളി പരാതി നല്‍കി.മനുഷ്യാവകാശ കമ്മീഷനും, വനിതാ കമ്മീഷനും, ഡിജിപിക്കും, സിറ്റി പൊലീസ് കമ്മീഷണര്‍ക്കും, കന്റോണ്‍മെന്റ് പൊലീസ് സ്റ്റേഷന്‍ എസ്എച്ച്ഒയ്‌ക്കുമാണ് നസിയ പരാതി നല്‍കിയത്.
തൃശൂര്‍ കേരളവര്‍മ്മ കോളേജിലെ യൂണിയന്‍ തെരഞ്ഞെടുപ്പ് അട്ടിമറിച്ചത് ആര്‍ ബിന്ദു ഇടപെട്ടെന്നാരോപിച്ചായിരുന്നു പ്രകടനം. ഇതിനിടെയാണ് പൊലീസിന്റെ അടി കൊണ്ട് കെഎസ് യു സംസ്ഥാന നിര്‍വാഹക സമിതി അംഗമായ നസിയ മുണ്ടപ്പള്ളിക്ക് ഗുരുതരമായി പരിക്കേറ്റത്.
ആക്രമണം നടത്തിയ പൊലീസുകാരന്റെ ഫോട്ടോയും വിലാസവും ഉള്‍പ്പെടെ ആണ് പരാതി നല്‍കിയിരിക്കുന്നത്. വനിതാ പൊലീസിന്റെ അസാന്നിധ്യത്തിലും സാന്നിധ്യത്തിലും സമരത്തിനെത്തുന്ന വനിതകള്‍ക്കെതിരെ പുരുഷ പൊലീസില്‍ നിന്നും നേരിടേണ്ടിവരുന്ന അസഭ്യവര്‍ഷവും അതിക്രമങ്ങളും അവസാനിപ്പിക്കാന്‍ നടപടി വേണമെന്നും പരാതിയിലുണ്ട്.
പ്രതികരിക്കാൻ ഇവിടെ എഴുതുക: