കൊച്ചി: വൈദ്യശാസ്ത്ര രംഗത്ത് ആധുനിക സാങ്കേതികവിദ്യയും റോബോട്ടിക് സര്‍ജറിയും വ്യാപകമായ കാലഘട്ടത്തില്‍ ആരോഗ്യ ഇന്‍ഷുറന്‍സ് ലഭിക്കുന്നതിന് 24 മണിക്കൂര്‍ ആശുപത്രിവാസം വേണമെന്ന കമ്പനികളുടെ നിബന്ധന അവകാശങ്ങളുടെ ലംഘനമാണെന്ന് എറണാകുളം ജില്ലാ ഉപഭോക്തൃ കോടതി.
മരട് സ്വദേശി ജോണ്‍ മില്‍ട്ടന്റെ അമ്മയുടെ കണ്ണു ശസ്ത്രക്രിയയ്‌ക്ക് ചെലവായ തുക ഇന്‍ഷുറന്‍സ് കമ്പനി നിഷേധിച്ച കേസിലാണ് ഉത്തരവ്. ഒരു ദിവസം പോലും ആശുപത്രിയില്‍ കിടക്കാതെ തന്നെ ആധുനിക സാങ്കേതികവിദ്യയുടെ സഹായത്തോടെ ശസ്ത്രക്രിയ നടത്തി, ഡിസ്ചാര്‍ജായി. എന്നാല്‍ ആശുപത്രിവാസമില്ലാത്തതിനാല്‍ ഒപി ചികിത്സയായി കണക്കാക്കി ഇന്‍ഷുറന്‍സ് കമ്പനി ക്ലെയിം നിരസിച്ച സാഹചര്യത്തിലാണ് പോളിസി ഉടമ എറണാകുളം ജില്ലാ ഉപഭോക്തൃ കോടതിയെ സമീപിച്ചത്.
മുമ്പ് കിടത്തി ചികിത്സ ആവശ്യമുണ്ടായിരുന്ന പല കേസുകളിലും ഇപ്പോള്‍ സാങ്കേതികവിദ്യയുടെ സഹായത്താല്‍ മണിക്കൂറുകള്‍ക്കുള്ളില്‍ ചികിത്സ പൂര്‍ത്തിയാക്കാന്‍ കഴിയും. രാജ്യത്തു ശാസ്ത്ര സഹായത്താല്‍ ചികിത്സാരംഗത്തുണ്ടായ കുതിച്ചുചാട്ടത്തിനൊപ്പം അനുബന്ധ സേവന രംഗങ്ങളും പുരോഗമന സ്വഭാവം കാണിക്കണം.
കുറഞ്ഞ സമയത്തില്‍ ചികിത്സ അവസാനിച്ചാലും ഇന്‍ഷുറന്‍സ് പരിരക്ഷയ്‌ക്ക് അര്‍ഹതയുണ്ടാകും. കൂടാതെ മയോപിയ ചികിത്സയ്‌ക്ക് ഉപയോഗിക്കുന്ന പ്രത്യേക ഇഞ്ചക്ഷന്‍, ഇന്‍ഷുറന്‍സ് പരിധിയില്‍പ്പെടുമെന്ന ഇന്‍ഷുറന്‍സ് റെഗുലേറ്ററി അതോറിറ്റിയുടെ സര്‍ക്കുലറും കോടതി പരിഗണിച്ചു.
ഇന്‍ഷുറന്‍സ് കമ്പനിയുടെ നടപടി പോളിസി ഉടമയ്‌ക്ക് നല്കേണ്ട സേവനത്തിന്റെ വീഴ്ചയാണെന്ന് ബോധ്യമായ കോടതി ഉപയോക്താവിന് പിഴയായി 57,720 രൂപ 30 ദിവസത്തിനകം നല്കാന്‍ ഉത്തരവിട്ടു. ജില്ലാ ഉപഭോക്തൃ തര്‍ക്ക പരിഹാര കമ്മിഷന്‍ പ്രസിഡന്റ് ഡി.ബി. ബിനു, മെമ്പര്‍മാരായ വൈക്കം രാമചന്ദ്രന്‍, ടി.എന്‍. ശ്രീവിദ്യ എന്നിവരുടെ ബെഞ്ചാണ് വിധി പ്രസ്താവിച്ചത്.
പ്രതികരിക്കാൻ ഇവിടെ എഴുതുക: