പെരിന്തൽമണ്ണ: പതിനൊന്നുകാരിയായ മകളെ നിരന്തരം പീഡിപ്പ കേസിൽ പിതാവിന് തടവും പിഴയും. കുട്ടിയെ അഞ്ച് വയസുമുതൽ നിരന്തരമായി അതിഗുരുതര ലൈംഗിക അതിക്രമത്തിന് ഇരയാക്കിയ കേസിലാണ് നടപടി. പ്രതിയായ പിതാവിന് 97 വർഷം തടവും 1,10,000 രൂപ പിഴയുമാണ് ശിക്ഷ വിധിച്ചത്. പെരിന്തൽമണ്ണ അതിവേഗ പ്രത്യേക കോടതി ജഡ്ജി എസ് സൂരജ് ആണ് ശിക്ഷ വിധിച്ചത്.
കുട്ടിയുടെ സംരക്ഷണ ചുമതലയുള്ള വ്യക്തി തന്നെ പീഡിപ്പിച്ചതിനാൽ ഇന്ത്യൻ ശിക്ഷാ നിയമത്തിലെ 376 (3) പ്രകാരമുള്ള 30 വർഷം കഠിനതടവും 25,000 രൂപ പിഴയുമാണ് കൂടിയ ശിക്ഷ. മറ്റൊരു വകുപ്പിൽ 20 വർഷം തടവും 25,000 രൂപ പിഴയും വിധിച്ചു. പോക്‌സോ നിയമത്തിലെ മൂന്ന് വകുപ്പുകൾ അനുസരിച്ച് 20,10,15 വർഷങ്ങൾ വീതം കഠിനതടവും 60,000 രൂപ പിഴയും വിധിച്ചിട്ടുണ്ട്. ഇവയ്‌ക്ക് പുറമേ ബാലനീതി നിയമപ്രകാരം രണ്ട് വർഷം കഠിനതടവും അനുഭവിക്കണം. പിഴ അടച്ചില്ലെങ്കിൽ നാലര വർഷം അധികം കഠിനതടവ് അനുഭവിക്കണം.
2019-ൽ കരുവാരക്കുണ്ട് പോലീസ് സ്‌റ്റേഷനിൽ രജിസ്റ്റർ ചെയ്ത കേസിലാണ് 64-കാരനായ പിതാവിനെ ശിക്ഷിച്ചത്. മാതാവിന്റെ അസുഖത്തെ തുടർന്ന് ബന്ധുവീട്ടിൽ താമസിച്ചപ്പോൾ അവിടുത്തെ കുട്ടിയോട് വിവരം പറയുകയായിരുന്നു. സംഭവം അറിഞ്ഞ മാതാവാണ് പോലീസിൽ പരാതി നൽകിയത്.
പ്രതികരിക്കാൻ ഇവിടെ എഴുതുക: