ഇതുവരെ എല്ലാം ശുഭം; ലാന്‍ഡര്‍ വേര്‍പെട്ടു; സോഫ്റ്റ് ലാന്‍ഡിങ്ങിനായി ഇനി ഏഴു നാള്‍ കാത്തിരിപ്പ്

ബംഗളൂരു: ചന്ദ്രയാന്‍ 3ന്റെ അഞ്ചാമത്തെയും അവസാനത്തെയുമായ ഭ്രമണപഥം താഴ്‌ത്തല്‍ വിജയകരമായതിനു പിന്നാലെ പ്രൊപ്പല്‍ഷന്‍ മൊഡ്യൂളും വിക്രം ലാന്‍ഡറും വേര്‍പെട്ടതു വിജയകരമായി. ചന്ദ്രോപരിതലത്തിനു 100 കിലോമീറ്റര്‍ മുകളിലെത്തിയ ശേഷമാണ് പ്രൊപ്പല്‍ഷന്‍ മൊഡ്യൂളില്‍ നിന്നു ലാന്‍ഡര്‍ വേര്‍പ്പെട്ടത്. തുടര്‍ന്ന് ലാന്‍ഡര്‍ ഇറങ്ങാനുള്ള തയാറെടുപ്പ് ആരംഭിച്ചു. ത്രസ്റ്റര്‍ എന്‍ജിന്‍ ഉപയോഗിച്ച് വേഗം കുറച്ച് താഴേക്കെത്തും. ചന്ദ്രോപരിതലത്തിന് 800 മീറ്റര്‍ ഉയരത്തില്‍ എത്തുമ്പോള്‍ 2 ത്രസ്റ്റര്‍ എന്‍ജിനുകളുടെ സഹായത്തോടെ അന്തരീക്ഷത്തില്‍ അല്‍പനേരം നിശ്ചലമായി നില്‍ക്കും. പിന്നീട് സെക്കന്‍ഡില്‍ 12 മീറ്റര്‍ വേഗത്തിലാകും താഴെയിറങ്ങുന്നത്. ഈ ഘട്ടത്തില്‍ ചന്ദ്രന് സമാന്തരമായി നീങ്ങിക്കൊണ്ടിരിക്കുന്ന പേടകത്തെ ചന്ദ്രനിലേക്ക് കുത്തനെയിറക്കാന്‍ കഴിയുംവിധത്തില്‍ ദിശമാറ്റുകയും ലാന്‍ഡര്‍ മൊഡ്യൂളിന്റെ ചലനവേഗം നിയന്ത്രിക്കുകയും ചെയ്യല്‍ അതിപ്രധാനമാണ്.

ഇന്നലെ രാവിലെ എട്ടരയോടെ നിര്‍ണായക ചുവടുവയ്പുമായി പേടകം ഒരുവശത്ത് 153 കിലോമീറ്ററും മറുവശത്ത് 163 കിലോമീറ്ററുമുള്ള ഭ്രമണപഥത്തിലെത്തിയിരുന്നു. വേര്‍പെട്ട ശേഷം പ്രജ്ഞാന്‍ റോവര്‍ അടക്കമുള്ള ലാന്‍ഡര്‍ ചന്ദ്രനിലേക്കു സഞ്ചരിച്ച് 100 കി.മീ. അടുത്ത ഭ്രമണപഥത്തിലെത്തി, ഇറങ്ങേണ്ടിടം കണ്ടെത്തും, അവിടത്തെ പ്രത്യേകതകള്‍ മനസ്സിലാക്കും. ഈ പഥത്തിന്റെ ഒരുവശം ചന്ദ്രന്റെ 30 കി.മീ. അടുത്താണ്.
ദക്ഷിണ ധ്രുവത്തില്‍ നാലു കി.മീ. വീതിയും 2.4 കി.മീ. നീളവുമുള്ളയിടമാണ് ലാന്‍ഡിങ്ങിനു യോജിച്ചതായി മനസ്സിലാക്കിയിരിക്കുന്നത്. 30 കി.മീ. അടുത്ത ശേഷമാകും ലാന്‍ഡിങ്.

ലാന്‍ഡറിന്റെ വേഗം കുറച്ച് മണിക്കൂറില്‍ 10 കി.മീറ്ററാക്കും. പിന്നെ ലാന്‍ഡറിനെ നാലു കാലും അടിയിലാകുന്ന രീതിയില്‍ കുത്തനെയാക്കണം. ഈ മാസം 23ന് വൈകിട്ടാണ് ലാന്‍ഡിങ്. താഴ്ന്നുവന്ന് വിക്രം ചന്ദ്രോപരിതലത്തില്‍ കാലുകുത്തും. ഇതോടെ ചരിത്രം പിറക്കും, ചന്ദ്രനില്‍ സോഫ്റ്റ് ലാന്‍ഡ് ചെയ്യുന്ന നാലാമത്തെ രാജ്യമാകും ഭാരതം. ദക്ഷിണ ധ്രുവത്തിലിറങ്ങുന്ന ആദ്യ രാജ്യവും.