തിരുവില്വാമല: ഗവ. വൊക്കേഷണല്‍ ഹയര്‍ സെക്കന്‍ഡറി സ്‌കൂളില്‍ സ്ഥാപിച്ച ഗാന്ധി പ്രതിമ സ്വാതന്ത്ര്യദിനത്തില്‍ അനാഛാദനം ചെയ്യും. ഗവ. വൊക്കേഷണല്‍ ഹയര്‍ സെക്കന്ററി സ്‌കൂളിലെ 1987 – 88 എസ്എസ്എല്‍സി ബാച്ച് പൂര്‍വ്വ വിദ്യാര്‍ത്ഥി കൂട്ടായ്മയായ കൂട്ട് 88 ന്റെ നേതൃത്വത്തിലാണ് വിദ്യാലയത്തിന്റെ തിരുമുറ്റത്ത് രാഷ്‌ട്രപിതാവിന്റെ പൂര്‍ണകായ പ്രതിമ സ്ഥാപിച്ചിരിക്കുന്നത്. ഓഗസ്റ്റ് 15 ന് സ്വാതന്ത്ര്യദിനത്തില്‍ പഴയകാല അധ്യാപകരാണ് ഗാന്ധി പ്രതിമ അനാച്ഛാദനം ചെയ്യുക.
105 വയസിലേക്ക് കടക്കുന്ന വിദ്യാലയത്തിന് 35 വര്‍ഷങ്ങള്‍ക്കു മുമ്പ് പടിയിറങ്ങിയ പൂര്‍വ്വ വിദ്യാര്‍ത്ഥികള്‍ എന്തെങ്കിലും ഒരു സമ്മാനം നല്‍കണമെന്ന് തീരുമാനിക്കുകയും, ആ ചര്‍ച്ച ഒടുവില്‍ ഗാന്ധി പ്രതിമയില്‍ എത്തിച്ചേരുകയുമായിരുന്നു.
മൂന്നു മാസത്തോളം സമയമെടുത്ത് തിരുവില്വാമല പട്ടിപ്പറമ്പ് സ്വദേശിയും സ്‌കൂളിലെ പൂര്‍വ്വ വിദ്യാര്‍ത്ഥിയുമായ സുരേഷ് ബാബുവാണ് ഗാന്ധി പ്രതിമ നിര്‍മിച്ചത്. രാഷ്‌ട്രനിര്‍മിതിയില്‍ പ്രധാന പങ്കു വഹിച്ച പലരെയും പുതു തലമുറ മറന്നുകൊണ്ടിരിക്കുന്ന കാലഘട്ടത്തില്‍, ഒരു ഓര്‍മപ്പെടുത്തല്‍ കൂടിയാണ് ഈ ഗാന്ധി പ്രതിമ എന്ന് കൂട്ട് 88 പൂര്‍വ്വ വിദ്യാര്‍ത്ഥി കൂട്ടായ്മയിലെ അംഗങ്ങള്‍ പറയുന്നു.
പ്രതികരിക്കാൻ ഇവിടെ എഴുതുക: