കോട്ടയം: തിരുവാര്‍പ്പില്‍ പഞ്ചായത്ത് ഓഫീസിന് മുകളില്‍ കയറി ആത്മഹത്യാ ഭീഷണിയുമായി കര്‍ഷകന്‍. തിരുവാര്‍പ്പ് സ്വദേശി ബിജുവാണ് കെട്ടിടത്തിന്റെ മുകളില്‍ കയറിയത്. കഴുത്തില്‍ കയര്‍ കുരുക്കി താഴേക്ക് ചാടുമെന്നായിരുന്നു ഭീഷണി. പോലീസ് എത്തി ഇയാളെ അനുനയിപ്പിച്ച് താഴെയിറക്കി.
കൃഷിയിടത്തില്‍ വെള്ളം എത്തിക്കാത്ത പഞ്ചായത്ത് നടപടിയില്‍ പ്രതിഷേധിച്ചാണ് ആത്മഹത്യാ ഭീഷണി. പലതവണ ആവശ്യപ്പെട്ടിട്ടും തന്റെ കൃഷിയിടത്തിലേക്ക് ആവശ്യമായ വെള്ളം ലഭിച്ചില്ലെന്ന് ഇയാള്‍ പറഞ്ഞു. 1.32 ഏക്കർ വയലിനോട് ചേർന്നുള്ള ചാൽ അടഞ്ഞടിനാൽ നീരൊഴുക്ക് തടസപ്പെട്ടുവെന്നും പാടശേഖരത്തിന്റെ ഉടമയാണ് ചാൽ അടച്ചതെന്നും പരാതിയിൽ പറയുന്നു. ഇതേ തുടർന്ന് വയലിൽ കൃഷിയിറക്കാനാവാതെ ബുദ്ധിമുട്ടുകയാണ് ബിജു. തുടർന്നാണ് ആത്മഹത്യ ഭീഷണിയുമായി പഞ്ചായത്ത് ഓഫീസിനു മുകളിൽ കയറിയത്.
നീതി ഉറപ്പാക്കാമെന്ന തഹസീൽദാരുടെ ഉറപ്പിനെ തുടർന്നാണ് ബിജുവിനെ അനുനയിപ്പിച്ച് താഴെയിറക്കിയത്.
പ്രതികരിക്കാൻ ഇവിടെ എഴുതുക: