കോട്ടയം: പൊതുജനങ്ങളുടെ പരാതി പരിഹരിക്കുന്നതിനായി ജില്ലയില്‍ താലൂക്ക് അടിസ്ഥാനത്തില്‍ നടത്തിയ ‘കരുതലും കൈത്താങ്ങും’ അദാലത്തിലൂടെ 1347 പരാതികള്‍ പരിഹരിച്ചതായി മന്ത്രിമാരായ വി.എന്‍. വാസവനും, റോഷി അഗസ്റ്റിനും അറിയിച്ചു.
താലൂക്കുതല അദാലത്തുകളുടെ പരിഗണനയ്‌ക്കു വന്ന പരാതികളില്‍ അവശേഷിച്ചവയില്‍ തീര്‍പ്പുകല്‍പ്പിക്കുന്നതിനായി കളക്ട്രേറ്റ് കോണ്‍ഫറന്‍സ് ഹാളില്‍ ചേര്‍ന്ന ഉദ്യോഗസ്ഥതല ജില്ലാതല അദാലത്ത് യോഗത്തില്‍ പങ്കെടുത്തശേഷമാണ് മന്ത്രിമാര്‍ ഇക്കാര്യം അറിയിച്ചത്.
മേയ് 2, 4, 6, 9, 20 തിയതികളിലാണ് ജില്ലയിലെ കോട്ടയം, ചങ്ങനാശേരി, കാഞ്ഞിരപ്പള്ളി, വൈക്കം, മീനച്ചില്‍ താലൂക്കുകളിലായി അദാലത്തുകള്‍ സംഘടിപ്പിച്ചത്. അദാലത്തുകളില്‍ ആകെ 2564 പരാതികളാണ് ലഭിച്ചത്. ഇതില്‍ 658 പരാതികള്‍ അദാലത്തിലെ വിഷയമല്ലാത്തതിനാല്‍ നിരസിച്ചു. 573 എണ്ണം പരിഹാരം സാധ്യമല്ലാത്തതാണ്. ശേഷിച്ച 1303 പരാതികള്‍ ഇന്നലത്തെ ഉദ്യോഗസ്ഥ തല യോഗത്തിനു മുമ്പേ പരിഹരിക്കാനായി. അപകടകരമായ മരങ്ങള്‍ മുറിച്ചുമാറ്റണമെന്ന പരാതികളില്‍ അടിയന്തരനടപടിയെടുക്കാന്‍ മന്ത്രിമാര്‍ അദാലത്തില്‍ ആവശ്യപ്പെട്ടു.
കാലിവളര്‍ത്തല്‍ ഫാമിലെ മാലിന്യപ്രശ്നം, സ്‌കോളര്‍ഷിപ്പ്, പട്ടികജാതി വിഭാഗത്തില്‍പ്പെട്ടവര്‍ക്കുള്ള ധനസഹായം, തോട്ടിലെ നീരൊഴുക്ക് തടയുന്നത്, നടപ്പുവഴി, കെട്ടിടനമ്പര്‍ ലഭിക്കാത്തത്, വീടുവയ്‌ക്കുന്നതിനായി നിലംനികത്താന്‍ അനുമതി, സ്റ്റാമ്പ് ഡ്യൂട്ടിയില്‍ ഇളവ് തുടങ്ങിയ പരാതികളാണ് ഇന്നലെ അദാലത്തില്‍ മന്ത്രിമാര്‍ക്കു മുന്നിലെത്തിയത്. ഏറ്റവും കൂടുതല്‍ പരാതികള്‍ പരിഹരിച്ചത് കോട്ടയം താലൂക്കിലാണ്. ജില്ലാ കളക്ടര്‍ വി. വിഗ്്നേശ്വരി, അഡീഷണല്‍ ജില്ലാ മജിസ്ട്രേറ്റ് റെജി പി.ജോസഫ്, ആര്‍ഡിഒമാരായ വിനോദ് രാജ്, പി.ജി. രാജേന്ദ്രബാബു, ജില്ലാ തല ഉദ്യോഗസ്ഥര്‍, താലൂക്ക് തല ഉദ്യോഗസ്ഥര്‍ എന്നിവര്‍ യോഗത്തില്‍ പങ്കെടുത്തു.
പ്രതികരിക്കാൻ ഇവിടെ എഴുതുക: