തിരുവനന്തപുരത്ത് ഓടിക്കൊണ്ടിരുന്ന കെഎസ്ആർടിസി ബസിന് തീപിടിച്ചു; യാത്രക്കാർ സുരക്ഷിതർ, കത്തിനശിച്ചത് ആറ്റിങ്ങൽ ഡിപ്പോയിലെ ബസ്

തിരുവനന്തപുരം: യാത്രയ്‌ക്കിടെ കെഎസ്ആർടിസി ബസിന് തീപിടിച്ചു. തിരുവനന്തപുരം ചിറയിൻകീഴ് അഴൂരിലാണ് സംഭവം. ആറ്റിങ്ങൽ ഡിപ്പോയിലെ ബസിനാണ് തീപിടിച്ചത്.  39 യാത്രക്കാരുമായി ചിറയിൻകീഴിൽ നിന്ന് കണിയാപുരത്തേക്ക് പോയ ബസിലാണ് തീപിടിച്ചത്.  

യാത്രക്കാരെ ഉടൻതന്നെ പുറത്തിറക്കിയതിനാൽ വൻ അപകടം ഒഴിവായി. അഗ്നിശമനസേനയുടെ രണ്ട് യൂണിറ്റ് സ്ഥലത്തെത്തിയാണ് തീയണച്ചത്. ബസ് പൂർണമായും കത്തി നശിച്ചു. കയറ്റം കയറുന്നതിനിടെ ബസിന്റെ എന്‍ജിന്റെ ഭാഗത്തുനിന്ന് പുക ഉയരുന്നത് ഡ്രൈവറുടെയും യാത്രക്കാരുടെയും ശ്രദ്ധയില്‍പ്പെടുകയായിരുന്നു. തുടര്‍ന്ന് ഡ്രൈവര്‍ ബസ് നിര്‍ത്തി. ബസിലുണ്ടായിരുന്ന മുഴുവൻ യാത്രക്കാരെയും പുറത്തിറക്കി. ഇതിന് പിന്നാലെയാണ് ബസിന് തീപടര്‍ന്നത്.