തിരുവനന്തപുരം: വിമാനത്താവളങ്ങളില്‍ യാത്രക്കാരുടെ സൗകര്യം വര്‍ധിപ്പിക്കുന്നതിന് സാങ്കേതികവിദ്യ പരമാവധി പ്രയോജന പ്പെടുത്തണമെന്ന് കേന്ദ്രസഹമന്ത്രി ജനറല്‍ വി കെ സിംഗ് (റിട്ട,) നിര്‍ദേശിച്ചു. രണ്ടു ദിവസത്തെ സംസ്ഥാന സന്ദര്‍ശനത്തിനെത്തിയ അദ്ദേഹം തിരുവനന്തപുരം വിമാനത്താവളത്തിന്റെ വികസന പ്രവര്‍ത്തനങ്ങള്‍ അവലോകനം ചെയ്തു.
മലിനീകരണം ഒഴുവാക്കുന്നതിന് വിമാനത്താവളങ്ങളില്‍ ഇലക്ട്രിക് വാഹനങ്ങള്‍ പരമാവധി ഉപയോഗിക്കണമെന്ന് കേന്ദ്രമന്ത്രി നിര്‍ദേശിച്ചു. നിലവില്‍ തിരുവനന്തപുരം വിമാനത്താവളത്തില്‍ 40% വാഹനങ്ങള്‍ ഇലക്ട്രിക് ആണ്. ചെന്നൈ വിമാനത്താവളത്തിലേത് പോലെ വനിത സ്വയം സഹായ സംഘങ്ങളുടെ വിപണനകേന്ദ്രങ്ങള്‍ക്ക് സൗകര്യമൊരുക്കണം. ഇതിലൂടെ വനിതാ ശാക്തീകരണത്തിന് കൂടുതല്‍ അവസരം നല്‍കുമെന്നും കേന്ദ്ര സഹമന്ത്രി പറഞ്ഞു. തിരുവനന്തപുരം വിമാനത്താവളത്തിന്റെ വികസനപ്രവര്‍ത്തനങ്ങളില്‍ വി.കെ. സിംഗ് സംതൃപ്തി രേഖപ്പെടുത്തി.
വിമാനത്താവള വികസനത്തിനായി രൂപം നല്‍കിയ മിഷന്‍ 2028 മാസ്റ്റര്‍ പ്ലാനിന്റെ വിശദാംശങ്ങള്‍ സംബന്ധിച്ച അവതരണം യോഗത്തില്‍ നടന്നു. അമേരിക്ക, ബ്രിട്ടണ്‍, സിംഗപ്പൂര്‍ എന്നിവിടങ്ങളിലെ വ്യോമയാന കണ്‍സള്‍ട്ടന്‍സികളുടെ സഹായത്തോടെയാണ് ലോക നിലവാരത്തിലുള്ള മാസ്റ്റര്‍ പ്ലാന്‍ തയ്യാറാക്കിയത്. നിലവില്‍ പ്രതിവര്‍ഷം 4.5 ദശലക്ഷം യാത്രക്കാരാണ് തിരുവനന്തപുരം വിമാനത്താവളം പ്രയോജനപ്പെടുത്തുന്നത്. ഇത് 202425 ല്‍ 6.2 ദശലക്ഷമാകും.
2026-27ല്‍ 12.4 ദശലക്ഷത്തിലേക്ക് ഉയര്‍ത്താനാണ് മാസ്റ്റര്‍പ്ലാന്‍ വിഭാവനം ചെയ്യുന്നത്. വിമാനത്താവള വികസനത്തിന് 36 ഏക്കര്‍ സ്ഥലം കൂടി ലഭിക്കുന്നത്തോടെ തിരുവനന്തപുരം വിമാനത്താവളം പ്രതിവര്‍ഷം 27 ദശലക്ഷം യാത്രക്കാര്‍ എന്ന പരമാവധി ശേഷിയില്‍ എത്തും. ചീഫ് എയര്‍പോര്‍ട്ട് ഓഫീസര്‍ എം ദര്‍ശന്‍ സിംഗ്, റീജിയണല്‍ എക്‌സിക്യൂട്ടീവ് ഡയറക്ടര്‍ എയര്‍പോര്‍ട്ട് അതോറിറ്റി ഓഫ് ഇന്ത്യ സജീവ് ജി പണിക്കര്‍, സിഐഎസ്എഫ് ഉദ്യോഗസ്ഥര്‍ തുടങ്ങിയവര്‍ അവലോകന യോഗത്തില്‍ സംബന്ധിച്ചു.
പ്രതികരിക്കാൻ ഇവിടെ എഴുതുക: