തിരുവനന്തപുരം : കേരളത്തിലെ അരിവില വര്‍ധനയില്‍ നിയന്ത്രണം ഏര്‍പ്പെടുത്തുന്നതിനായി മറ്റ് സംസ്ഥാനങ്ങളില്‍ നിന്നും അരി എത്തിക്കാന്‍ നീക്കം ആരംഭിച്ചതായി ഭക്ഷ്യമന്ത്രി ജി.ആര്‍. അനില്‍. ആന്ധ്രയില്‍ നിന്നും ഈ മാസം തന്നെ സംസ്ഥാനത്തേയ്‌ക്ക് അരി എത്തിക്കുമെന്നും മന്ത്രി പ്രതികരിച്ചു.
സംസ്ഥാനത്തിന് ആവശ്യമുള്ള അരിയുടെ 18 ശതമാനം മാത്രമാണ് ഇവിടെ ഉല്‍പാദിപ്പിക്കുന്നത്. മറ്റ് സംസ്ഥാനങ്ങളെ ആശ്രയിച്ചാണ് കേരളത്തിലെ അരി വിപണി. അതുകൊണ്ടുതന്നെ മറ്റ സംസ്ഥാനങ്ങളിലെ വിലക്കയറ്റം നമ്മുടെ നാട്ടിലും പ്രതിഫലിക്കുമെന്നും. വിലക്കയറ്റം സംസ്ഥാനത്തെ സാധാരണ ജനങ്ങളെ ബാധിക്കാതിരിക്കാന്‍ സര്‍ക്കാര്‍ വിപണിയില്‍ ഇടപെടുന്നുണ്ട്. വിലക്കയറ്റം നിയന്ത്രിക്കാന്‍ സപ്ലൈകോയുടെ അരി വണ്ടി ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
അരിവണ്ടിയില്‍ നിന്ന് 25 രൂപ നിരക്കില്‍ ജയ, കുറുവ അരി ലഭിക്കും. മട്ടയരിക്ക് കിലോയ്‌ക്ക് 24 രൂപയും പച്ചരി കിലോയ്‌ക്ക് 23 രൂപയുമായിരിക്കും. ഒരു റേഷന്‍ കാര്‍ഡിന് പരമാവധി പത്ത് കിലോ അരി ഈ അരിവണ്ടിയില്‍ നിന്ന് ലഭിക്കുമെന്നും അദ്ദേഹം പറഞ്ഞു. സപ്ലൈകോയുടെ ഔട്ട്ലെറ്റ് ഇല്ലാത്ത സംസ്ഥാനത്തെ 500 ഓളം വരുന്ന താലൂക്ക്, പഞ്ചായത്ത് കേന്ദ്രങ്ങളില്‍ അരി വണ്ടി എത്തും. അരി വില നിയന്ത്രിക്കാനായി വിപണി ഇടപെടല്‍ പെട്ടെന്ന് നടത്തുമെന്നും അദ്ദേഹം പറഞ്ഞു.
അതേസമയം മലയാളികള്‍ക്ക് ഏറ്റവും പ്രീയപ്പെട്ട ജയ അരി വ്യാപകമായി ലഭിക്കാന്‍ ബുദ്ധിമുട്ടാണ്. ജയ അരിയുടെ ഉത്പ്പാദനം ആന്ധ്രയില്‍ നിര്‍ത്തിയതായും ഈ വിളയിപ്പോള്‍ കൃഷി ചെയ്യുന്നില്ലെന്നും മന്ത്രി അനിലുമായി സംസാരിച്ചശേഷം ആന്ധ്ര മന്ത്രി കെ.പി. നാഗേശ്വരറാവു അറിയിച്ചു. എന്നാല്‍ മറ്റ് അരി ഇനങ്ങളും കടല, വന്‍ പയര്‍, മല്ലി, വറ്റല്‍ മുളക്, പിരിയന്‍ മുളക് എന്നിവ അടുത്ത് തന്നെ കേരളത്തില്‍ എത്തിക്കാനും അന്ധ്ര സിവില്‍ സപ്ലൈസ് കോര്‍പ്പറേഷനുമായി ധാരണയില്‍ എത്തിയിട്ടുണ്ട്.
പ്രതികരിക്കാൻ ഇവിടെ എഴുതുക: