ദോഹ: കാല്‍പ്പന്തുകളിയുടെ ലോകമാമാങ്കത്തില്‍ വിസിലുയരാന്‍ ഏഴ് ആഴ്ചകള്‍ മാത്രം ബാക്കിനില്‍ക്കേ ഖത്തര്‍ തയ്യാറെടുപ്പുകളെല്ലാം പൂര്‍ത്തിയാക്കുന്നു. ലോകകപ്പിന് വേദിയാകുന്ന ഏറ്റവും ചെറിയ രാജ്യമാണെങ്കിലും ഏറ്റവും വലിയ മേളയാക്കി ചരിത്രം കുറിക്കാനുള്ള തയ്യാറെടുപ്പാണ് ഖത്തറിന്റേത്.
ലോകകപ്പിന് വേദിയാകുന്ന എട്ട് സ്റ്റേഡിയങ്ങളും പൂര്‍ണസജ്ജമായി. ഏറ്റവും അവസാനം തുറന്നുകൊടുത്തത് മിഡില്‍ ഈസ്റ്റിലെ ഏറ്റവും വലിയ സ്റ്റേഡിയമായ ലുസൈല്‍. സപ്തംബര്‍ ഒന്‍പതിനാണ് സ്റ്റേഡിയം തുറന്നത്. സൗദി-ഈജിപ്ഷ്യന്‍ സൂപ്പര്‍ കപ്പായിരുന്നു ഉദ്ഘാടന മത്സരം. മറ്റ് സ്റ്റേഡിയങ്ങളെല്ലാം 2021-ല്‍ തന്നെ തുറന്നിരുന്നു ഫിഫ ക്ലബ് ലോകകപ്പ്, ഫിഫ അറബ് കപ്പ്, അമീര്‍ കപ്പ്, കഴിഞ്ഞ ജൂണില്‍ നടന്ന ഇന്റര്‍ കോണ്ടിനന്റല്‍ പ്ലേ ഓഫ്, സ്റ്റാര്‍സ് ലീഗ് മത്സരങ്ങളെല്ലാം അവയില്‍ അരങ്ങേറുകയും ചെയ്തിരുന്നു. മുന്‍ ലോകകപ്പുകളില്‍ നിന്ന് വ്യത്യസ്തമായി ഒരു സ്റ്റേഡിയത്തില്‍ നിന്ന് മറ്റൊന്നിലേക്ക് ദീര്‍ഘദൂരം സഞ്ചരിക്കേണ്ട ആവശ്യമില്ല. എട്ട് സ്റ്റേഡിയങ്ങളും നിലകൊള്ളുന്നത് 135 കീലോമീറ്റര്‍ മാത്രം റോഡകലങ്ങളില്‍.
ലോകകപ്പില്‍ പങ്കെടുക്കുന്ന ടീമുകളെല്ലാം അവസാന ഘട്ട ഒരുക്കങ്ങളിലാണ്. ടീമുകളെ പ്രഖ്യാപിച്ചിട്ടില്ലെങ്കിലും ഓരോ പരിശീലകരും ടീം അംഗങ്ങളെ തെരഞ്ഞെടുക്കുന്നതിനുള്ള കഠിപ്രയത്നത്തിലാണ്. എന്നാല്‍ ചില പ്രമുഖ താരങ്ങള്‍ പരിക്കിന്റെ പിടിയിലാണെന്നത് ലോകകപ്പ് സ്വപ്നം കാണുന്ന രാജ്യങ്ങള്‍ക്ക് തിരിച്ചടിയാവാനും സാധ്യതയുണ്ട്. വന്‍ സമ്മാനത്തുകയാണ് ജേതാക്കളെ കാത്തിരിക്കുന്നത്. ചാമ്പ്യന്മാര്‍ക്ക് 4.2 കോടി ഡോളര്‍ ലഭിക്കും. റണ്ണര്‍അപ്പിന് മൂന്ന് കോടി ഡോളറും മൂന്നും നാലും സ്ഥാനക്കാര്‍ക്ക് യഥാക്രമം 2.7, 2.5 കോടി ഡോളറും ലഭിക്കും.
ഫിഫ ലോകകപ്പ് കാണാന്‍ ഖത്തറിലേക്ക് വലിയൊരു ശതമാനം ആരാധകരും എത്തുമെന്നതിനാല്‍ കാണികളുടെ എണ്ണം റെക്കോര്‍ഡില്‍ എത്തും. സുപ്രീം കമ്മിറ്റി ഫോര്‍ ഡെലിവറി ആന്‍ഡ് ലെഗസി നടത്തിയ പഠനം അനുസരിച്ച് ലോകത്തിന്റെ നാനാ ഭാഗങ്ങളില്‍ നിന്നായി 300-400 കോടി ആളുകള്‍ ഖത്തറില്‍ നടക്കുന്ന ലോകകപ്പ് വീക്ഷിക്കും. 1,700 കോടി ഡോളര്‍ വരുമാനമാണ് ലോകകപ്പില്‍ നിന്ന് സംഘാടകര്‍ പ്രതീക്ഷിക്കുന്നത്. ലോകകപ്പിന്റെ അടിസ്ഥാന സൗകര്യങ്ങള്‍ക്കും നിര്‍മാണങ്ങള്‍ക്കുമായി ഇതുവരെ 800 കോടി ഡോളറാണ് ചെലവിട്ടിരിക്കുന്നത്. 12,000 മാധ്യമ പ്രതിനിധികള്‍ ഉള്‍പ്പെടെ 10 ലക്ഷത്തിലധികം പേരെയാണ് ഖത്തറിലേക്ക് ലോകകപ്പ് കാണാന്‍ പ്രതീക്ഷിക്കുന്നത്.
പ്രതികരിക്കാൻ ഇവിടെ എഴുതുക: