ന്യൂദല്‍ഹി : സാമ്പത്തിക തട്ടിപ്പ് കേസുമായി ബന്ധപ്പെട്ട് ബോളീവുഡ് താരം നടി ജാക്വിലിന്‍ ഫെര്‍ണാണ്ടസിനെ ദല്‍ഹി പോലീസ് ചോദ്യംചെയ്തു. സാമ്പത്തിക കുറ്റാന്വേഷണ വിഭാഗമാണ് നടിയെ ബുധനാഴ്ച ചോദ്യംചെയ്തത്. സുകേഷ് ചന്ദ്രശേഖര്‍ പ്രതിയായ 200 കോടിയുടെ തട്ടിപ്പ് കേസിനെ കുറിച്ച് കൂടുതല്‍ അറിയുന്നതിനായാണ് നടപടി.
ഇതേകേസില്‍ തന്നെ നേരത്തെ എന്‍ഫോഴ്‌സ്‌മെന്റ് ഡയറക്ടറേറ്റ് ജാക്വിലിനെ ചോദ്യം ചെയ്യുകയും പ്രതിചേര്‍ക്കുകയുമുണ്ടായി. നടിയുടെ പേരിലുള്ള ഏഴരക്കോടിയുടെ സ്വത്തും ഇഡി കണ്ടുകെട്ടി. അതിനു പിന്നാലെയാണ് ദല്‍ഹി പോലീസും ചോദ്യം ചെയ്യാനായി വിളിപ്പിച്ചിരിക്കുന്നത്.
ദല്‍ഹി മന്ദിര്‍ മാര്‍ഗിലെ ഓഫീസില്‍ ജാക്വിലിനെ സുകേഷിന് പരിചയപ്പെടുത്തി നല്‍കിയെന്ന് പറയുന്ന പിങ്കി ഇറാനിയും ബുധനാഴ്ച ചോദ്യംചെയ്യലിന് ഹാജരായിരുന്നു. ഇരുവരെയും ഒരുമിച്ചിരുത്തി ചോദ്യംചെയ്യുന്നതിലൂടെ കേസില്‍ കൂടുതല്‍ വ്യക്തത വരുമെന്നാണ് അന്വേഷണ ഉദ്യോഗസ്ഥരുടെ പ്രതീക്ഷിക്കുന്നത്.
വരുംദിവസങ്ങളിലും നടിയുടെ ചോദ്യംചെയ്യല്‍ തുടരുമെന്നും അധികൃതര്‍ അറിയിച്ചു. വിശദമായി ചോദ്യം ചെയ്യാനുണ്ട്. ഇതിനായി നടിയോട് ദല്‍ഹിയില്‍തന്നെ തുടരാനും അന്വേഷണസംഘം നിര്‍ദേശിച്ചിട്ടുണ്ട്.
പ്രതികരിക്കാൻ ഇവിടെ എഴുതുക: