കൊച്ചി: ഐഎന്‍എസ് വിക്രാന്ത് രാജ്യത്തിന് അഭിമാനമെന്ന് മുന്‍ പ്രതിരോധമന്ത്രി എ.കെ ആന്റണി. കടലിലെ വെല്ലുവിളികള്‍ നേരിടാന്‍ ഐഎന്‍എസ് വിക്രാന്ത് അനിവാര്യമാണെന്നും അദ്ദേഹം പറഞ്ഞു. ചൈനയുടെ കടന്നു കയറ്റം ഇന്ത്യയ്‌ക്ക് വലിയ ഭീഷണിയാണ്. വിക്രാന്തിന്റെ വരവോടെ രണ്ട് വിമാനവാഹിനി കപ്പലുകള്‍ ഉള്ള രാജ്യമായി ഇന്ത്യ മാറി. മൂന്നാമതൊരു കപ്പല്‍ കൂടി നിര്‍മ്മിക്കാന്‍ തയാറാകണമെന്നും എ.കെ ആന്റണി ആവശ്യപ്പെട്ടു. ജയ്ഹിന്ദ് ന്യൂസിനോട് പ്രതികരിക്കുകയായിരുന്നു അദ്ദേഹം.
ഏറ്റവും സന്തോഷവും അഭിമാനവും നിറഞ്ഞ മുഹൂര്‍ത്തമാണിതെന്ന് എ.കെ ആന്റണി പറഞ്ഞു. ഓരോ ഇന്ത്യക്കാരനും ഏറ്റവും കൂടുതല്‍ ആഹ്ലാദിക്കേണ്ട നിമിഷമാണ്. വിക്രാന്തിന്റെ നിര്‍മ്മാണപ്രവര്‍ത്തനം ഓരോ ഘട്ടത്തിലുമുള്ള പ്രതിസന്ധികളെ അതിജീവിച്ച് മുന്നോട്ട് കൊണ്ടുപോകാന്‍ സഹായിച്ച കൊച്ചിന്‍ ഷിപ്പ് യാര്‍ഡിലെ എല്ലാ എന്‍ജിനീയര്‍മാരെയും മറ്റ് ജീവനക്കാരെയും പ്രത്യേകം അഭിനന്ദിക്കുന്നതായും അദ്ദേഹം പറഞ്ഞു.
‘2009 ല്‍ പ്രതിരോധ മന്ത്രി ആയിരുന്നപ്പോളാണ് ഐഎന്‍എസ് വിക്രാന്തിന്റെ കീല്‍ ലേയിംഗ് കര്‍മ്മം നിര്‍വഹിച്ചത്. നേവിയുടെ പാരമ്പര്യം അനുസരിച്ച് പ്രധാനപ്പെട്ട കപ്പലുകള്‍ ലോഞ്ച് ചെയ്യുന്നത് മുഖ്യ അതിഥിയുടെ ഭാര്യയാണ്. അതുകൊണ്ട് 2013 ല്‍ എലിസബത്ത് ആന്റണി ആണ് കൊച്ചിന്‍ ഷിപ്പ് യാര്‍ഡില്‍ വെച്ച് ഐഎന്‍എസ് വിക്രാന്ത് ലോഞ്ച് ചെയ്തത്. ഈ ചടങ്ങിലാണ് ഷിപ്പില്‍ പേര് എഴുതിയത്. അതിനു പേരിട്ടതും എലിസബത്ത് ആണ്. ഇപ്പോള്‍ പ്രധാനമന്ത്രി ഐഎന്‍എസ് വിക്രാന്ത് ഇന്ത്യയ്‌ക്ക് സമര്‍പ്പിച്ചിരിക്കുകയാണ്. ഇതോടെ രണ്ട് വിമാനവാഹിനി കപ്പലുകള്‍ ഉള്ള രാജ്യമായി ഇന്ത്യ മാറിയിരിക്കുകയാണ്. ലോകത്തിലെ ചുരുക്കം ചില രാജ്യങ്ങള്‍ക്ക് മാത്രമേ ഇതുള്ളൂ. ഐഎന്‍എസ് വിക്രമാദിത്യ, ഐഎന്‍എസ് വിക്രാന്ത് എന്നീ രണ്ട വിമാനവാഹിനി കപ്പലുകള്‍ ഇപ്പോള്‍ നമുക്കുണ്ട്. ഇതോടെ കടലില്‍ ഏത് പ്രതിസന്ധി വന്നാലും അതിനെ കൂടുതല്‍ ശക്തമായി നേരിടാനാകും’ എ.കെ ആന്റണി പറഞ്ഞു.
നിലവിലെ അന്താരാഷ്‌ട്ര സാഹചര്യങ്ങളില്‍ ഈ പദ്ധതി അനിവാര്യമായിരുന്നുവെന്ന് എ.കെ ആന്റണി ചൂണ്ടിക്കാട്ടി. ഇന്ത്യചൈന അതിര്‍ത്തി കഴിഞ്ഞാല്‍ ഇന്ന് ഏറ്റവും കൂടുതല്‍ വെല്ലുവിളികള്‍ നേരിടുന്നത് കടലിലാണ്. ആദ്യകാലത്ത് ഒരു നാവിക ശക്തി അല്ലാതിരുന്ന ചൈന ഇപ്പോള്‍ കൂടുതല്‍ ശക്തമായ അവസ്ഥയിലാണ്. ചൈനയുടെ കടന്നു കയറ്റം ഇന്ത്യയ്‌ക്ക് വലിയ ഭീഷണിയാണ്. ഈ സാഹചര്യത്തില്‍ മൂന്നാമതൊരു വിമാനവാഹിനി കപ്പല്‍ കൂടി നിര്‍മ്മിക്കാന്‍ തയാറാകണമെന്നും അദ്ദേഹം കൂട്ടിച്ചേര്‍ത്തു.
പ്രതികരിക്കാൻ ഇവിടെ എഴുതുക: