കണ്ണൂര്‍: ആറളത്ത് കര്‍ഷകനെ ആന ചവിട്ടിക്കൊന്നു. കണ്ണൂര്‍ ആറളം ഫാം ഏഴാം ബ്ലോക്കിലെ ദാമു (45) ആണ് മരിച്ചത്. ഈറ്റവെട്ടാന്‍ ഇറങ്ങിയപ്പോഴായിരുന്നു ദാമുവിനെ ആന ആക്രമിച്ചത്. വനംവകുപ്പ് ഉദ്യോഗസ്ഥര്‍ ആനയെ തുരത്താന്‍ ശ്രമിക്കുകയാണ്. കണ്ണൂരിലെ മലയോര മേഖലയില്‍ കാട്ടാന ശല്യം രൂക്ഷമായി തുടരുകയാണ്.
ഇന്ന് രാവിലെ ആറളം ഫാമില്‍ സെക്യൂരിറ്റി ജീവനക്കാരന്റെ ഇരുചക്രവാഹനം കാട്ടാന തകര്‍ത്തിരുന്നു. പാലപ്പുഴയില്‍ ഫാം ഗെയ്റ്റില്‍ ഡ്യൂട്ടിയില്‍ ഉണ്ടായിരുന്ന സതീഷ് നാരായണന്റെ ഇരുചക്രവാഹനമാണ് ഇന്ന് പുലര്‍ച്ചെ അഞ്ചോടെ കാട്ടാന തകര്‍ത്തത്. ചെക്‌പോസ്റ്റില്‍ ഡ്യൂട്ടിയില്‍ ഉണ്ടായിരുന്ന സതീഷ് നാരായണന്‍ അത്ഭുതകരമായി രക്ഷപെടുകയായിരുന്നു.
കാട്ടാന ഫാമിനകത്ത് നിന്ന് ടാര്‍ റോഡ് വഴി നടന്ന് വന്ന് ചെക് മുന്നില്‍ എത്തി ഇവിടെ നിര്‍ത്തിയിട്ട ഇരുചക്ര വാഹനം തുമ്പി കൈക്ക് എടുത്ത് പൊക്കി റോഡിലേക്ക് എറിഞ്ഞ് ചിന്നം വിളിച്ച് തിരികെ കാട്ടിലേക്ക് മെയിന്‍ റോഡ് വഴി പോയി. പയ്യാവൂർ പഞ്ചായത്തിലെ ജനവാസ മേഖലയിൽ പുലർച്ചെ വരെ നിലയുറപ്പിച്ച കാട്ടാനക്കൂട്ടം പ്രദേശത്തെ വാഴയുൾപ്പടെ നിരവധി കൃഷികൾ നശിപ്പിച്ചു.
പ്രതികരിക്കാൻ ഇവിടെ എഴുതുക: