ഇരിട്ടി: നിര്‍ത്താതെ പെയ്യുന്ന കനത്ത മഴയില്‍ ഭീതിയിലായി ഇരിട്ടിയുടെ മലയോര മേഖല. ജില്ലാ ദുരന്ത നിവാരണ അതോറിറ്റി മേഖലയിലെ ചെങ്കല്‍ – കരിങ്കല്‍ ക്വറികളുടെ പ്രവര്‍ത്തനം 10 ദിവസം നിര്‍ത്തി വെക്കാന്‍ ഉത്തരവിട്ട് നിര്‍ത്തിവെപ്പിച്ചെങ്കിലും നിരവധി ക്വാറികള്‍ പ്രവര്‍ത്തിച്ചു വന്നിരുന്ന മലയോരം കടുത്ത ഭീതിയിലാണ്. അണമുറിയാതെ പെയ്യുന്ന മഴമൂലം മണ്ണിടിച്ചിലും ഉരുള്‍ പൊട്ടലും ഇത്തരം പ്രദേശങ്ങളിലെ ജനങ്ങളുടെ ഉറക്കം കെടുത്തുകയാണ്.
കാലാകാലങ്ങളായി അയ്യന്‍കുന്ന് പഞ്ചായത്തിലെ വാണിയപ്പാറ, വാളത്തോട്, എടപ്പുഴ, പാറയ്‌ക്കാപ്പാറ, അങ്ങാടിക്കടവ് മേഖലകളിലും, ഉളിക്കല്‍ പഞ്ചായത്തിലെ മാട്ടറ, കോളിത്തട്ട്, അറബി, കാലങ്കി മേഖലകളിലും കേളകം, കൊട്ടിയൂര്‍ പഞ്ചായത്തുകളിലെ വനമേഖലയോട് ചേര്‍ന്ന് കിടക്കുന്ന ഭാഗങ്ങളിലുമാണ് ഉരുള്‍പൊട്ടല്‍ ഭീഷണി നിലനില്‍ക്കുന്നത്. കുടക് ജില്ലയില്‍ വീരാജ്പേട്ട താലൂക്കിലും ബ്രഹ്മഗിരി വന്യജീവി സങ്കേത്തതിലും കനത്ത മഴ തുടരുകയാണ്. വനമേഖലയില്‍ കനത്ത മഴ തുടരുന്നതിനാല്‍ ബാവലി, ബാരപോള്‍ പുഴകളില്‍ നീരൊഴുക്ക് കൂട്ടിയിട്ടുണ്ട്.
റവന്യു വകുപ്പിന്റെയും പോലീസിന്റെയും നേതൃത്വത്തില്‍ മേഖലകളില്‍ നിരീക്ഷണവും പരിശോധനയും നടത്തിവരുന്നുണ്ട്. ക്വാറികളില്‍ ഖനനം നടക്കുന്നില്ലെന്ന് ഉറപ്പുവരുത്തുകയും ചെയ്യുന്നുണ്ട്. അയ്യന്‍കുന്നിലെ വണിയപ്പാറ മേഖലകളില്‍ ക്വാറികളില്‍ നിറഞ്ഞു നില്ക്കുന്ന വെള്ളവും മണ്ണിടിച്ചല്‍ ഭീഷണി സൃഷ്ടിക്കുന്നുണ്ട്. ഇത്തരം ക്വാറികളില്‍ മണ്ണ് മാന്തി യന്ത്രത്തിന്റെ സഹായത്തോടെ വെള്ളം ഒഴുക്കിക്കളഞ്ഞ് നിരൊഴുക്ക് സുഗമമാക്കുന്നതിനുള്ള പ്രവര്‍ത്തനങ്ങളും നടത്തിവരുന്നു. കഴിഞ്ഞ രണ്ട് പ്രളയകാലത്തും അയ്യന്‍കുന്നില്‍ നാലോളം സ്ഥലങ്ങളിലാണ് വലിയ മണ്ണിടിച്ചലും ഉരുള്‍പൊട്ടലും ഉണ്ടായത്. ഈ അനുഭവങ്ങള്‍ വെച്ചുകൊണ്ടുള്ള പ്രവര്‍ത്തനമാണ് മേഖലകളില്‍ നടക്കുന്നത്. ഉളിക്കല്‍ പഞ്ചായത്തിലെ അറബി, കോളിത്തട്, മാട്ടറ, പേരട്ട ഭാഗങ്ങളിലും സമാന സാഹചര്യം ഉണ്ടായതിനാല്‍ ഇവിടങ്ങളെല്ലാം റവന്യു സംഘത്തിന്റെ നിരീക്ഷണത്തിലാണ്.
ഏതു നേരവും മൂടിക്കെട്ടിയ അന്തരീക്ഷവും തുടര്‍ച്ചയായ മഴയും മണ്ണിടിച്ചലിനും ഉരുള്‍പെട്ടിനുമുള്ള സാധ്യത കൂട്ടുകയാണ്. അതുകൊണ്ട് തന്നെ ഈ മേഖലകളിലേക്കുള്ള യാത്രകളും മറ്റ് പ്രവര്‍ത്തനങ്ങളും പരമാവധി ഒഴിവാക്കുകയാണ് പലരും. തുടര്‍ച്ചയായ മഴ ജനജീവിതത്തേയും കാര്യമായി ബാധിച്ചിട്ടുണ്ട്. രണ്ടു ദിവസമായി ഇരിട്ടി ഉള്‍പ്പെടെ മലയോരത്ത പ്രധാന ടൗണുകളില്‍ ജനങ്ങള്‍ ഇറങ്ങാത്ത അവസ്ഥയാണ്. പല റോഡുകളിലും വെള്ളക്കെട്ട് രൂപപ്പെട്ടത് മൂലം ഗതാഗതത്തിനും തടസ്സം സൃഷ്ടിക്കുകയാണ്. പ്രധാന പുഴകളിലേക്ക് ഒഴുകിയെത്തുന്ന ചെറു തോടുകളും അരുവികളും കരകവിഞ്ഞ് ഒഴുകാന്‍ തുടങ്ങിയതും വെള്ളപൊക്ക ഭീഷണി ഉയര്‍ത്തുന്നുണ്ട്.
പ്രതികരിക്കാൻ ഇവിടെ എഴുതുക: