വടക്കാഞ്ചേരി: പ്രളയത്തില്‍ വീട് തകര്‍ന്നു. ടാര്‍പോളിന്‍ ഷീറ്റിനടിയില്‍ ദുരിതജീവിതം നയിക്കുന്ന നിര്‍ധന കുടുംബത്തിന് വേണം തലചായ്ക്കാനൊരിടം. തെക്കുംകര പഞ്ചായത്തില്‍ പഴയന്നൂര്‍പ്പാടം സ്വദേശിനി വെല്ലിശ്ശേരി വീട്ടില്‍ പങ്കജാക്ഷി(85)യും കുടുംബവുമാണ് കൊടിയ ദുരിതമനുഭവിക്കുന്നത്.Â
35 വര്‍ഷം മുന്‍പ് ഭര്‍ത്താവ് മാധവന്‍ നായര്‍ മരണപ്പെട്ടതോടെ കൂലിവേല ചെയ്താണ് പങ്കജാക്ഷി മൂന്ന് പെണ്‍മക്കളും ഒരു മകനുമുള്‍പ്പടെയുള്ള കുടുംബം പുലര്‍ത്തിയിരുന്നത്. ജീവിത വഴിയില്‍ കരുത്താകേണ്ടിയിരുന്ന മകന് അരവിന്ദാക്ഷന് (50) മാനസിക വൈകല്യം പിടിപെട്ടതോടെ വരുമാനത്തിന് മറ്റൊരു മാര്‍ഗമില്ലാതായി. നിലവില്‍ റേഷനരിയും വയോധികയ്‌ക്ക് ലഭിക്കുന്ന പെന്‍ഷന്‍തുകയും മാത്രമാണ് ജീവിക്കാനുള്ള ആശ്രയം. മരുന്ന് വാങ്ങാന്‍ പോലും പണമില്ലാത്ത അവസ്ഥയാണെന്ന് കണ്ണീരോടെ പങ്കജാക്ഷിയമ്മ പറഞ്ഞു.
കാറ്റും മഴയും വരുന്നത് കണ്ടാല്‍ വയോധികയുടെ നെഞ്ചിടിപ്പേറും. അടച്ചുറപ്പുള്ള സുരക്ഷിതമായൊരു ഭവനത്തിനായി പഞ്ചായത്തിലും ബന്ധപ്പെട്ട അധികൃതര്‍ക്കും അപേക്ഷകള്‍ നല്‍കി കാത്തിരിക്കുകയാണ് കുടുംബം.
പ്രതികരിക്കാൻ ഇവിടെ എഴുതുക: