മുംബൈ: തകര്‍ത്തടിക്കുകയാണ് അനിയന്‍ പാണ്ഡ്യ, ലഖ്‌നൗ ആകെ പരിഭ്രാന്തിയില്‍. കൈയിലെ കളി നഷ്ടപ്പെടുമോയെന്ന സംശയമായിരുന്നു ബാക്കി. എന്നാല്‍ നായകന്‍ കെ.എല്‍. രാഹുല്‍ ചേട്ടന് പാണ്ഡ്യയെന്ന വജ്രായുധത്തെ ദൗത്ത്യമേല്‍പ്പിച്ചു. ആവശ്യം അനിയന്‍ പാണ്ഡ്യയുടെ വിക്കറ്റ്.
ഗുജറാത്തിന്റെ ഹാര്‍ദിക് പാണ്ഡ്യക്കെതിരെ പന്തെറിയാന്‍ ചേട്ടന് ക്രുണാല്‍ പാണ്ഡ്യ എത്തിയതോടെ കാണികളും കൗതുകത്തിലായി. ആ കൗതുകം കൂടുതല്‍ ആവേശമായത് പത്താം ഓവറിലെ ആദ്യ പന്തിലായിരുന്നു. നായകന്റെ ആവശ്യം അക്ഷരം പ്രതി നടപ്പാക്കിയ ക്രുണാല്‍ ഹാര്‍ദിക്കിനെ മനീഷ് പാണ്ഡ്യയുടെ കൈയിലെത്തിച്ചു. ഇതോടെ ആരാധകര്‍ പ്രതീക്ഷിച്ചത് വന്‍ ആഘോഷമാണ്. എന്നാല്‍ ആവേശം ഒതുക്കി പമ്മി ചിരിച്ച് സഹതാരങ്ങള്‍ക്കൊപ്പം വിക്കറ്റ് നേട്ടം പങ്കിട്ടു ക്രുണാല്‍. ആ പമ്മി ചിരിയും ആരാധകര്‍ വെറുതെ വിട്ടില്ല. അനിയനെ പുറത്താക്കി പമ്മി ചിരിക്കുന്ന ചേട്ടന് എത്ര മാര്‍ക്കെന്നായിരുന്നു ട്വിറ്ററിലെ ചോദ്യം. ഉത്തരം എന്തായാലും നൂറാകുമെന്ന് ഉറപ്പ്.
പ്രതികരിക്കാൻ ഇവിടെ എഴുതുക: