തിരുവനന്തപുരം: വിദേശ രാജ്യങ്ങളിലെ അനന്ത സാധ്യതകള്‍ കേരളത്തിലെ നഴ്‌സുമാര്‍ക്ക് ലഭ്യമാകുന്നതിനായി പ്രത്യേക പരിശീലനമൊരുക്കി സംസ്ഥാന വനിതാ വികസന കോര്‍പ്പറേഷന്‍. അഡ്വാന്‍സ്ഡ് സ്‌കില്‍ എന്‍ഹാന്‍സ്‌മെന്റ് പ്രോഗ്രാം ഫോര്‍ നഴ്‌സസ്(എ.എസ്.ഇ.പി.എന്‍) എന്ന പദ്ധതി വഴിയാണ് പരിശീലനം നല്‍കുക. വൈദ്യ ശുശ്രൂഷാ മേഖലയിലും ഭാഷ, കംപ്യൂട്ടര്‍ പരിജ്ഞാനം, പെരുമാറ്റം തുടങ്ങിയ വിവിധ മേഖലകളിലും പരിശീലനം നല്‍കി നഴ്‌സുമാര്‍ക്ക വിദേശത്ത് തൊഴില്‍ സാധ്യത ഉറപ്പാക്കും.
വനിതാ വികസന കോര്‍പ്പറേഷനും സെന്റര്‍ ഫോര്‍ മാനേജ്‌മെന്റ് ഡെവലപ്‌മെന്റും(സി.എം.ഡി) ഓവര്‍സീസ് ഡെവലപ്‌മെന്റ് ആന്‍ഡ് എംപ്ലോയ്‌മെന്റ് പ്രോഗ്രാം കണ്‍സള്‍ട്ടന്റ്‌സ് ലിമിറ്റഡ്(ഒഡെപെകും) സംയുക്തമായാണു ഇത് ആവിഷ്‌കരിച്ചിരിക്കുന്നത്. ഇംഗ്ലിഷ് ഭാഷ മെച്ചപ്പെടുത്തുന്നതിനായി ഐ.ഇ.എല്‍.ടി.എസ് / ഒ.ഇ.ടി പരീക്ഷകള്‍ പാസാക്കുന്നതിനുള്ള പാഠഭാഗങ്ങള്‍ തുടങ്ങിയവ ഉള്‍പ്പെടുത്തിയിട്ടുണ്ട്.
അടിസ്ഥാന നഴ്‌സിങ് സ്‌കില്ലിനു പുറമേ എമര്‍ജന്‍സി ആന്‍ഡ് ക്രിട്ടിക്കല്‍ കെയര്‍, ഇന്‍ഫെക്ഷന്‍ കണ്‍ട്രോള്‍ ആന്‍ഡ് പേഷ്യന്‍ സേഫ്റ്റി, കംപ്യൂട്ടര്‍ അടിസ്ഥാന വൈദഗ്ധ്യം, പെരുമാറ്റം, സമീപനം എന്നിവ മെച്ചപ്പെടുത്തുന്നതിനുള്ള സോഫ്റ്റ് സ്‌കില്‍ പരിശീലനവും ഉറപ്പുവരുത്തുന്നു. ഒരു ബാച്ചില്‍ 30 പേര്‍ക്കു വീതം ആറു മാസമാണ് പരിശീലന കാലാവധി.
80 ശതമാനം ഹാജരോടെ പരിശീലനം വിജയകരമായി പൂര്‍ത്തിയാക്കുന്നവര്‍ക്കു ഫീസ് തിരികെ നല്‍കും. പട്ടികജാതി/പട്ടികവര്‍ഗ/ട്രാന്‍സ്‌ജെന്‍ഡര്‍ വിഭാഗത്തിന് 100 ശതമാനം ഫീസ് ഇളവു നല്‍കും. മറ്റു വിഭാഗത്തിലുള്ളവര്‍ക്ക് 9,000 രൂപയും ജി.എസ്.ടിയുമായിരിക്കും ഫീസ്. കോഴ്‌സ് വിജയകരമായി 80 ശതമാനം ഹാജര്‍ പൂര്‍ത്തിയാക്കുന്നവര്‍ക്ക് 12,000 രൂപ തിരികെ നല്‍കും.
കോഴ്‌സ് പൂര്‍ത്തിയാക്കി 15 മാസത്തിനകം ഐ.ഇ.എല്‍.ടി.എസ് / ഒ.ഇ.ടി പാസാകാത്ത പരീശീലനാര്‍ഥികള്‍ക്ക് 6,000 രൂപ തിരികെ നല്‍കും. പരിശീലനം വിജയകരമായി പൂര്‍ത്തിയാക്കുന്നവര്‍ക്ക് യു.കെയിലുള്ള ആശുപത്രികളില്‍ ഒഡെപെക് മുഖേന ജോലി സാധ്യതയും വനിതാ വികസന കോര്‍പ്പറേഷന്‍ ഉറപ്പ് നല്‍ക്കുന്നു.
പ്രതികരിക്കാൻ ഇവിടെ എഴുതുക: