ബെംഗളൂരു: സംസ്ഥാനത്ത് വിദ്യാര്‍ത്ഥികള്‍ സ്‌കൂളുകളിലും കോളേജുകളിലും വരുന്നത് അറിവ് നേടാന്‍ മാത്രമാണെന്നും മതം പഠിക്കാനോ പ്രചരിപ്പിക്കാനോ ആയിരിക്കരുതെന്നും ആഭ്യന്തര മന്ത്രി അരഗ ജ്ഞാനേന്ദ്ര. സ്‌കൂളുകളിലും കോളേജുകളിലും കുട്ടികള്‍ ഹിജാബും കാവി ഷാളും ധരിക്കരുതെന്നും ഇക്കാര്യത്തില്‍ രാജ്യത്തിന്റെ ഐക്യം തകര്‍ക്കാന്‍ ശ്രമിക്കുന്ന മതസംഘടനകളെ നിരീക്ഷിക്കാന്‍ പോലീസിനോട് ആവശ്യപ്പെട്ടിട്ടുണ്ടെന്നും ആഭ്യന്തര മന്ത്രി പറഞ്ഞു.
എല്ലാ വിദ്യാര്‍ത്ഥികളും ഒരുമിച്ചു പഠിക്കേണ്ട സ്ഥലമായതിനാല്‍ ആരും തങ്ങളുടെ മതം പ്രചരിപ്പിക്കാന്‍ സ്‌കൂളില്‍ വരരുതെന്ന് അദ്ദേഹം പറഞ്ഞു. ഉഡുപ്പിയിലെ സര്‍ക്കാര്‍ പ്രീയൂണിവേഴ്‌സിറ്റി കോളേജില്‍ ചില വിദ്യാര്‍ത്ഥികള്‍ ഹിജാബ് (ഇസ്ലാമിക ശിരോവസ്ത്രം) ധരിച്ചതിനെ ചൊല്ലിയുള്ള തര്‍ക്കത്തെതുടര്‍ന്നാണ് ഈ പരാമര്‍ശം.
ഇതിനിടെ ഹിജാബ് ധരിച്ചെത്തിയ മുസ്ലിം വിദ്യാര്‍ത്ഥിനികളെ കുന്ദാപുര പിയു കോളേജിലെ പ്രിന്‍സിപ്പല്‍ ഗേറ്റില്‍ തടഞ്ഞു. ക്ലാസ് മുറിക്കുള്ളില്‍ ഹിജാബ് ധരിക്കാന്‍ പാടില്ലെന്നും പ്രവേശിക്കുന്നതിന് മുമ്പ് അത് അഴിച്ചുമാറ്റാനും സ്‌കൂള്‍ അധികൃതര്‍ ആവശ്യപ്പെട്ടിരുന്നു. ഹിജാബ് ധരിച്ച പെണ്‍കുട്ടികള്‍ക്കെതിരെ പ്രതിഷേധിച്ച് നൂറോളം ഹിന്ദു വിദ്യാര്‍ഥികള്‍ കഴിഞ്ഞ കാവി ഷാള്‍ ധരിച്ചാണ് ക്ലാസിലെത്തിയത്. ഇതേതുടര്‍ന്ന് കോളേജില്‍ സംഘര്‍ഷാവസ്ഥ നിലനിന്നിരുന്നു. എല്ലാ മതത്തില്‍പ്പെട്ട കുട്ടികള്‍ ഒരുമിച്ച് പഠിക്കേണ്ട സ്ഥലമാണ് സ്‌കൂളുകള്‍. ആരം വ്യത്യസ്തരല്ലെന്നും എല്ലാവരും ഭാരതമാതാവിന്റെ മക്കളാണെന്നും ജ്ഞാനേന്ദ്ര പറഞ്ഞു.
ആളുകള്‍ക്ക് സ്വതന്ത്രമായി മതം ആചരിക്കാനും പ്രാര്‍ത്ഥനകള്‍ നടത്താനും പള്ളികള്‍, മസ്ജിദുകള്‍, ക്ഷേത്രങ്ങള്‍ തുടങ്ങിയ സ്ഥലങ്ങളുണ്ടെന്നും ദേശീയ ഐക്യദാര്‍ഢ്യത്തിന്റെ സംസ്‌കാരം വളര്‍ത്തിയെടുക്കാന്‍ സ്‌കൂളുകളില്‍ കുട്ടികള്‍ക്ക് അക്കാദമിക അന്തരീക്ഷം ഉണ്ടാകണമെന്നും അദ്ദേഹം പറഞ്ഞു. സ്‌കൂളുകളുടെ അന്തരീക്ഷം സംഘര്‍ഷാവസ്ഥയിലേക്ക് മാറ്റാന്‍ ശ്രമിക്കുന്ന മത സംഘടനകളെ നിരീക്ഷിക്കാന്‍ പോലീസിനോട് ആവശ്യപ്പെട്ടിട്ടുണ്ടെന്ന് ആഭ്യന്തര മന്ത്രി വ്യക്തമാക്കി. രാജ്യത്തിന്റെ ഐക്യത്തെ തകര്‍ക്കാന്‍ ശ്രമിക്കുന്നവര്‍ക്കെതിരെ കര്‍ശന നടപടിയെടുക്കുമെന്ന് മന്ത്രി വ്യക്തമാക്കി. മതം ആചരിക്കാനും പ്രചരിപ്പിക്കാനും ആരും സ്‌കൂളില്‍ വരേണ്ടതില്ല. സ്‌കൂള്‍ പരിസരത്ത് ആരും ഹിജാബും കാവി ഷാളും ധരിക്കരുതെന്നും സ്‌കൂള്‍ മാനേജ്‌മെന്റ് കമ്മിറ്റികള്‍ നിശ്ചയിച്ചിട്ടുള്ള നിയമങ്ങള്‍ വിദ്യാര്‍ത്ഥികള്‍ നിര്‍ബന്ധമായും പാലിക്കണമെന്നും അദ്ദേഹം കൂട്ടിച്ചേര്‍ത്തു.
പ്രതികരിക്കാൻ ഇവിടെ എഴുതുക: