ന്യൂദല്‍ഹി: ദല്‍ഹിയില്‍ കര്‍ഷകസമരക്കാര്‍ ടെന്‍റ്കെട്ടി ദീര്‍ഘകാലസമരത്തിനൊരുങ്ങിയപ്പോള്‍ അതിനെ പിന്തുണച്ചതിന്റെ ശാപമാണ് കനേഡിയന്‍ പ്രധാനമന്ത്രി ജസ്റ്റിന്‍ ട്രൂഡോയ്‌ക്കെന്ന് ചിലര്‍. ഇപ്പോള്‍ കാനഡയുടെ തലസ്ഥാനമായ ഒട്ടാവോയില്‍ ട്രൂഡോയുടെ കോവിഡ് നയങ്ങള്‍ക്കെതിരെ സമരം ചെയ്യുന്ന ട്രക്കുകാര്‍ ദീര്‍ഘകാല സമരത്തിന്റെ സൂചനയായി ടെന്‍റുകള്‍ ഉയര്‍ത്തിയിരിക്കുകയാണ്. സമരക്കാര്‍ ഇതില്‍ താമസിച്ചായിരിക്കും ഇനി സമരം മുന്നോട്ട് കൊണ്ടുപോവുക.
ജസ്റ്റിന്‍ ട്രൂഡോ ഇപ്പോഴും ഒളിവില്‍ കഴിയുകയാണ്. അതിനിടെ സമരക്കാരെ ഒതുക്കാന്‍ ഉടനെ പട്ടാളത്തെ വിളിക്കുമെന്ന് ഒട്ടാവ പൊലീസ് മേധാവി പീറ്റര്‍ സ്ലോളി അഭിപ്രായപ്പെട്ടിരുന്നു. എന്നാല്‍ ഇതിനെ ട്രൂഡോ നിഷേധിച്ചു. തല്‍ക്കാലം പട്ടാളത്തെ ഇറക്കി സമരക്കാരെ തലസ്ഥാനനഗരിയില്‍ നിന്നും ഒഴിപ്പിക്കാന്‍ പദ്ധതിയില്ലെന്ന് അദ്ദേഹം പറഞ്ഞു.
ശനിയാഴ്ച മാത്രം 2700 പുതിയ ട്രക്കുകളാണ് സമരത്തിനായി ഒട്ടാവയില്‍ വരിവരിയായി എത്തിയത്. തലസ്ഥാനനഗരിയില്‍ ട്രാഫിക് ദിവസങ്ങളായി പൂര്‍ണ്ണസ്തംഭനത്തിലാണ്. ദല്‍ഹിയില്‍ ട്രാക്ടറായിരുന്നെങ്കില്‍ ഇവിടെ ട്രക്കുകളാണെന്ന വ്യത്യാസം മാത്രം. ട്രക്ക് ഡ്രൈവര്‍മാര്‍ നിര്‍ബന്ധമായും വാക്‌സിനെടുത്തിരിക്കണമെന്ന നയമാണ് അവരെ ട്രൂഡോ സര്‍ക്കാരിനെതിരെ തിരിച്ചിരിക്കുന്നത്. ഫ്രീഡം കോണ്‍വോയ് എന്ന പേരില്‍ അറിയപ്പെടുന്ന ട്രക്കുകാരുടെ ഈ സമരക്കൂട്ടായ്മയ്‌ക്ക് കാനഡയില്‍ വിവിധ തലങ്ങളില്‍ നിന്നും വര്‍ധിച്ച പിന്തുണയാണ് ലഭിക്കുന്നത്.
ഇന്ത്യയിലെ കര്‍ഷകസമരത്തെ പരസ്യമായി ജസ്റ്റിന്‍ ട്രൂഡോ പിന്തുണച്ചിരുന്നു. ഖലിസ്ഥാന്‍ അനുകൂല സംഘടനകളുടെ പ്രധാന കേന്ദ്രവും കാനഡയായി മാറിയിട്ടുണ്ട്. ഇവരുടെ പിന്തുണയുള്ള ചിലര്‍ ട്രൂഡോയുടെ മന്ത്രിസഭയില്‍ അംഗങ്ങളാണെന്നും റിപ്പോര്‍ട്ടുകളുണ്ട്.
പ്രതികരിക്കാൻ ഇവിടെ എഴുതുക: