തിരുവല്ല/കോട്ടയം/ചെങ്ങന്നൂര്‍: ശബരിമല തീര്‍ഥാടകര്‍ക്ക് ചെങ്ങന്നൂര്‍, തിരുവല്ല, കോട്ടയം റെയില്‍വേ സ്‌റ്റേഷനുകളില്‍ കൂടുതല്‍ സൗകര്യങ്ങള്‍ ഏര്‍പ്പെടുത്തുമെന്ന് മുതിര്‍ന്ന ബിജെപി നേതാവും റെയില്‍വേ പിഎസി ചെയര്‍മാനുമായ പി.കെ. കൃഷ്ണദാസ്. മൂന്നു റെയില്‍വേ സ്‌റ്റേഷനുകളും സന്ദര്‍ശിച്ച അദ്ദേഹം ഇവിടങ്ങളിലെ സൗകര്യങ്ങള്‍ വിലയിരുത്തി. കേരളത്തിലെയും ഇതര സംസ്ഥാനങ്ങളിലെയും ശബരിമല തീര്‍ഥാടകര്‍ ഏറ്റവും കൂടുതല്‍ എത്തുന്ന റെയില്‍വേ സ്‌റ്റേഷനുകളാണ് ഇവ.
യാത്രക്കാരോടും ഉദ്യോഗസ്ഥരോടും വിവരങ്ങള്‍ തിരക്കിയ അദ്ദേഹം ഇവിടങ്ങളില്‍ സ്‌പെഷല്‍ ട്രെയിനുകള്‍ക്ക് സ്റ്റോപ്പ് അനുവദിക്കാന്‍ ശ്രമിക്കുമെന്നും അറിയിച്ചു. തീര്‍ഥാടകരുടെ സൗകര്യാര്‍ത്ഥം കെഎസ്ആര്‍ടിസി ബസുകള്‍ റെയില്‍വേ സ്റ്റേഷനുകളിലേക്ക് സര്‍വീസ് നടത്താന്‍ വേണ്ട ക്രമീകരണങ്ങള്‍ നടത്താന്‍ ഉദ്യോഗസ്ഥരോട് നിര്‍ദേശിച്ചു. ദീര്‍ഘകാല അടിസ്ഥാനത്തിലുള്ള വികസന പ്രവര്‍ത്തനങ്ങള്‍ നടത്താന്‍ ആവശ്യമായ ഫണ്ടുകള്‍ ലഭ്യമാക്കാന്‍ റെയില്‍വേ മന്ത്രാലയത്തിന് ശിപാര്‍ശ നല്‍കും. ജന്മഭൂമിയുടെ തിരുവല്ല എഡിഷന്‍ ഓഫീസും പി.കെ. കൃഷ്ണദാസ് സന്ദര്‍ശിച്ചു.
പ്രതികരിക്കാൻ ഇവിടെ എഴുതുക: