ജനീവ: കൊവിഡ് പ്രതിസന്ധി 2022 ലും തുടരുമെന്ന മുന്നറിയിപ്പുമായി ലോകാരോഗ്യ സംഘടന (ഡബ്ല്യൂഎച്ച്ഒ). ദരിദ്ര രാജ്യങ്ങളിലെ വാക്‌സിന്‍ ലഭ്യതക്കുറവ് ചൂണ്ടിക്കാട്ടിയാണ് ഡബ്ല്യൂഎച്ച്ഒയിലെ സീനിയര്‍ വിദഗ്ധന്‍ ഡോ. ബ്രൂസ് അയ്ല്‍വാര്‍ഡ് ഈ മുന്നറിയിപ്പ് നല്‍കിയത്. ആഫ്രിക്കയിലെ ജനസംഖ്യയുടെ അഞ്ച് ശതമാനത്തില്‍ താഴെ മാത്രമാണ് ഇതുവരെ വാക്‌സിന്‍ സ്വീകരിച്ചത്.
ആഗോളതലത്തില്‍ ഇത് കേവലം 2.6% ശതമാനമാണ്. ഈ സാഹചര്യത്തില്‍, കൊവിഡ് പ്രതിസന്ധിയെ നമുക്ക് പെട്ടന്ന് മറികടക്കണമെങ്കില്‍ വികസിത രാജ്യങ്ങള്‍ ദരിദ്ര രാജ്യങ്ങള്‍ക്ക് വാക്‌സിന്‍ ഡോസുകള്‍ നല്‍കണം. മരുന്ന് കമ്പനികള്‍ അവരുടെ മുന്‍ഗണനാ പട്ടികയില്‍ ഈ രാജ്യങ്ങളെ ഉള്‍പ്പെടുത്തണം. ഇതിനായി ജീവകാരുണ്യ സംഘടനകളും തയ്യാറാകണം.
ആഗോള ജനസംഖ്യയുടെ 70 ശതമാനം പേര്‍ക്ക് ആവശ്യമായ കോവിഡ് വാക്‌സിന്‍ 2021 ല്‍ നിര്‍മ്മിക്കപ്പെട്ടു. എന്നാല്‍ കൂടുതല്‍ വാക്‌സിനുകളും വികസിത രാജ്യങ്ങള്‍ സ്വന്തമാക്കുകയായിരുന്നു. വാക്‌സിന്‍ നിര്‍മ്മിക്കുന്ന രാജ്യങ്ങള്‍ അവരുടെ ജനങ്ങളുടെ ഉപയോഗത്തിന് വേണ്ടിയും ബൂസ്റ്റര്‍ ഡോസുകള്‍ നല്‍കുന്നതിനായും കയറ്റുമതി നിയന്ത്രിച്ചു. അക്കാരണത്താല്‍ പല അവികസിത രാജ്യങ്ങള്‍ക്കും വാക്‌സിന്‍ പരിമിതമായേ ലഭിച്ചിട്ടുള്ളൂ.
ജനജീവിതം ഇനിയും സാധാരണ നിലയിലേക്ക് എത്തിയിട്ടില്ല. എത്രയും വേഗം വാക്‌സിന്‍ ലഭ്യത ഉറപ്പാക്കേണ്ടതുണ്ട്. പ്രതിസന്ധി വര്‍ഷങ്ങളോളം നീണ്ടുപോകാതിരിക്കാന്‍ വികസിത രാജ്യങ്ങള്‍ ദരിദ്ര രാജ്യങ്ങള്‍ക്ക് വാക്‌സിന്‍ നല്‍കുന്ന നടപടി വേഗത്തില്‍ സ്വീകരിക്കേണ്ടതുണ്ടെന്ന് അയ്ല്‍വാര്‍ഡ് പറഞ്ഞതായി ബിബിസി റിപ്പോര്‍ട്ട് ചെയ്തു.
പ്രതികരിക്കാൻ ഇവിടെ എഴുതുക: