തൃശൂര്‍: മന്ത്രിയുടെ വാഹനം കടന്നു പോകാന്‍ അനുവദിച്ചില്ലെന്നും പ്രകോപനപരമായി സംസാരിച്ചെന്നും ആരോപിച്ച്‌ മിനി ലോറി ഡ്രൈവറെ പോലീസ് അറസ്റ്റ് ചെയ്തു. ഉന്നതവിദ്യാഭ്യാസ മന്ത്രി ആര്‍ ബിന്ദുവിന്റെ വാഹനം കടന്നു പോകാന്‍ അനുവദിക്കാത്തതിനാണ് അറസ്റ്റ്.
കയ്പമംഗലം സ്വദേശി ആനന്ദഭവനത്തില്‍ സൂരജാണ് അറസ്റ്റിലായത്. ദേശീയ പാതയില്‍ ചാലക്കുടി മുനിസിപ്പല്‍ ജംഗ്ഷന്റെ സര്‍വീസ് റോഡില്‍ വെച്ചാണ് സംഭവമുണ്ടായത്. വീതി കുറഞ്ഞ സര്‍വ്വീസ് റോഡിലൂടെ എറണാകുളത്ത് നിന്നും ഇരിങ്ങാലക്കുടയിലേക്ക് പോയതാണ് മന്ത്രി. സിഗ്നല്‍ ജംഗ്ഷനില്‍ എത്തിയപ്പോള്‍ തുടരെ ഹോണ്‍ അടിച്ചിട്ടും മിനി ലോറി സൈഡ് നല്‍കിയില്ലെന്നാണ് പരാതി.
പിന്നീട് മിനി ലോറിയില്‍ നിന്നും പുറത്തിറങ്ങിയ സൂരജ് ഹോണ്‍ മുഴക്കിയതിന് ക്ഷോഭിച്ചതായും പറയുന്നു. ഇതോടെയാണ് മന്ത്രിയുടെ വാഹനം കടന്നു പോകാന്‍ അനുവദിക്കാത്തതിനും പ്രകോപനപരമായി സംസാരിച്ചതിനും പോലീസ് സൂരജിനെതിരെ കേസെടുത്തത്. പോലീസ് സ്‌റ്റേഷനില്‍ ഇയാളുടെ അറസ്റ്റ് രേഖപ്പെടുത്തിയശേഷം ജാമ്യത്തില്‍ വിട്ടു.
പ്രതികരിക്കാൻ ഇവിടെ എഴുതുക: