തിരുവനന്തപുരം: 2018ലെ മഹാപ്രളയത്തിനു ശേഷം വീണ്ടും സംസ്ഥാനത്ത് ഇടുക്കി അടക്കം മൂന്നൂ ഡാമുകള്‍ ഒന്നിച്ചു തുറക്കുന്നു. പമ്പ, ഇടമലയാര്‍ ഡാമുകളുടെ രണ്ടു ഷട്ടറുകള്‍ അതിരാവിലെ തുറന്നെങ്കിലും പ്രധാനപ്പെട്ട് ഇടുക്കി ചെറുതോണി അണക്കെട്ട് 11 മണിക്കാണ് തുറക്കുക. അണക്കെട്ടിന്റെ ചരിത്രത്തില്‍ ഇത് അഞ്ചാം തവണയാണ് തുറക്കാന്‍ പോകുന്നത്. ഇടുക്കി പദ്ധതിയിലെ ചെറുതോണി ഡാമിന്റെ മൂന്ന് ഷട്ടറുകള്‍ 35 സെന്റീമീറ്റര്‍ വീതമാകും ഉയര്‍ത്തുക. 2398 അടിയാണ് ഇപ്പോഴത്തെ ജലനിരക്ക്. എന്നാല്‍, നാളെ മുതല്‍ മഴ ശക്തമാകുന്ന മുന്നറിയിപ്പിനെ തുടര്‍ന്നാണ് ഡാം തുറന്നു വിടാന്‍ തീരുമാനിച്ചത്. 2018ല്‍ തുറന്നു വിട്ടതിനേക്കാള്‍ പത്തിലൊന്ന് വെള്ളം മാത്രമാണ് പുറത്തേക്ക് വിടുന്നത്. അതിനാല്‍ കാര്യമായ ആശങ്കയ്‌ക്കു കാരണമില്ല. പിന്നീട് ഇത് ആവശ്യമെങ്കില്‍ 50 സെന്റീമീറ്റര്‍ ആയി മാറ്റും. താഴെ പെരിയാര്‍ തീരങ്ങളിലുള്ളവര്‍ അതീവ ജാഗ്രത പാലിക്കാന്‍ ജില്ലാ ഭരണകൂടം നിര്‍ദേശിച്ചു. സെക്കന്‍ഡില്‍ ഒരു ലക്ഷം ലിറ്റര്‍ വെള്ളം പുറത്തേക്കൊഴുകും.
ബുധനാഴ്ച മുതല്‍ മഴ കനക്കുമെന്ന മുന്നറിയിപ്പ് കണക്കിലെടുത്ത് പമ്പ, ഇടമലയാര്‍ ഡാമുകളുടെ രണ്ടു ഷട്ടറുകള്‍ തുറന്നത്. പമ്പ ഡാമിന്റെ രണ്ട് ഷട്ടറുകള്‍ 30 സെന്റിമീറ്റര്‍ വീതം ഉയര്‍ത്തി. 25 ക്യുമെക്‌സ് മുതല്‍ 50 ക്യുമെക്‌സ് വെള്ളം ഒഴുക്കിവിടുന്നുണ്ട്. പമ്പാ നദിയില്‍ 10 സെന്റിമീറ്റര്‍ വരെ വെള്ളം ഉയരും. പമ്പാ നദിയുടെ കരയിലുള്ള റാന്നി, ആറന്മുള, ആറാട്ടുപുഴ, ചെങ്ങന്നൂര്‍ മേഖലകളില്‍ വെള്ളം ഉയരാന്‍ സാധ്യതയുണ്ട്.
ഇടമലയാര്‍ ഡാമിന്റെ രണ്ട് ഷട്ടറുകള്‍ 80 സെന്റിമീറ്റീര്‍ വീതം ഉയര്‍ത്തിയിട്ടുണ്ട്. ഇടമലയാറിലെ വെള്ളം കാലടി, ആലുവ മേഖലയില്‍ 12 മണിയോടെ എത്തും. പെരിയാറിലെ ജലനിരപ്പ് ഒരുമീറ്റര്‍ ഉയര്‍ന്നേക്കാമെന്നാണ് വിലയിരുത്തല്‍.
പ്രതികരിക്കാൻ ഇവിടെ എഴുതുക: