ന്യൂദല്‍ഹി: ഭാരതരത്‌ന നാനാജി ദേശ്മുഖിന്റെ ജന്മദിനത്തില്‍ ശ്രദ്ധാഞ്ജലി അര്‍പ്പിച്ച പ്രധാനമന്ത്രി നരേന്ദ്ര മോദി. മഹനായ ദാര്‍ശനികന് പ്രണാമങ്ങള്‍. അധ്വാനിക്കുന്ന കര്‍ഷകരെ ശാക്തീകരിക്കുന്നതിനുമായി അദ്ദേഹം സ്വയം സമര്‍പ്പിച്ചുവെന്നും അദ്ദേഹം ട്വീറ്റ് ചെയ്തു. നാനാജി ദേശ്മുഖിന്റെ ജന്മദിനത്തോടനുബന്ധിച്ച് 2017ല്‍ പ്രധാനമന്ത്രി നടത്തിയ പ്രസംഗത്തിന്റെ വീഡിയോയും പങ്കുവച്ചു. ഭാരതത്തിന്റെ വിവിധ ഇടങ്ങളില്‍ ബിജെപി പരിപാടികള്‍ സംഘടിപ്പിച്ചു. കേരളത്തില്‍ നടന്ന സംസ്ഥാനതല പരിപാടി ജനറല്‍ സെക്രിട്ടറി പി. സുധീര്‍ ഉത്ഘാടനം ചെയ്തു.
ഭാരതത്തിന്റെ ഗ്രാമങ്ങള്‍ സ്വയംപര്യാപ്തമാക്കാന്‍ സ്വജീവിതം സമര്‍പ്പിച്ച മാതൃകാപരമായ വ്യക്തിത്വമായിരുന്നു നാനാജിയെന്ന് സുധീര്‍ പറഞ്ഞു. സാമ്പത്തിക ബുദ്ധിമുട്ട് കാരണം ഉന്നത വിദ്യാഭ്യാസം കൈവരിക്കാന്‍ സാധിച്ചിരുന്നില്ലെങ്കിലും നാനാജി ഒരു സര്‍വ്വകലാശാലയായിരുന്നു. അറുപത് വയസ്സ് തികഞ്ഞപ്പോള്‍ പിന്നീടങ്ങോട്ട് രാഷ്‌ട്രീയത്തില്‍ നിന്ന് സ്വയം പിന്മാറിയ അദ്ദേഹം ഗ്രാമ പുനര്‍നിര്‍മ്മാണമെന്ന ലക്ഷ്യത്തില്‍ ശ്രദ്ധ പതിപ്പിച്ചു.
യു.പി യിലെ ഗോണ്ട എന്ന ജില്ല നാനാജി ദത്തെടുക്കുകയും, ഏറ്റവും പിന്നാക്കമായിരുന്ന ആ ജില്ലയെ സമൃദ്ധിയുടെ പ്രതീകമാക്കി മാറ്റുകയും ചെയ്തത് രാജ്യം അത്ഭുതത്തോടെയാണ് നോക്കിക്കണ്ടത്. രാജ്യത്തെ ഗ്രാമങ്ങളില്‍ സംഘത്തിന്റെ ആദര്‍ശം എത്തിച്ചതില്‍ അദ്ദേഹത്തിന്റെ പങ്ക് വളരെ വലുതാണെന്നും സുധീര്‍ പറഞ്ഞു.
പ്രതികരിക്കാൻ ഇവിടെ എഴുതുക: