തിരുവനന്തപുരം: കോണ്‍ഗസ് സംഘടനാ കാര്യ ദേശീയ ജനറല്‍ സെക്രട്ടറി കെസി വേണുഗോപലിനെതിരെ രൂക്ഷവിമര്‍ശനവുമായി പിഎസ് പ്രശാന്ത്. കെസി വേണുഗോപാലാണ് കേരളത്തില്‍ കോണ്‍ഗ്രസ് സംഘടന തകര്‍ച്ചയുടെ മൂല കാരണമെന്ന് പ്രശാന്ത് വിമര്‍ശിച്ചു. വേണുഗോപാലുമായി അടുത്ത് നില്‍ക്കുന്നവരാണ് ഡിസിസി തലപ്പത്ത്. കേരളത്തില്‍ മറ്റൊരുഗ്രൂപ്പ് ഉണ്ടാക്കുന്ന നടപടിയാണ് നേതൃത്വം സ്വീകരിച്ചിരിക്കുന്നതെന്നും വാര്‍ത്താ സമ്മേളനത്തില്‍ പ്രശാന്ത് തുറന്നടിച്ചു.
വര്‍ഗീയത പ്രോല്‍സാഹിപ്പിക്കുന്ന ആളാണ് പാലോട് രവിയെന്നും പ്രശാന്ത് പറഞ്ഞു. നെടുമങ്ങാട്ട് തന്നെ തോല്‍പിച്ചത് പാലോട് രവിയാണ്. ഇക്കാര്യം തെളിവുകള്‍ സഹിതം പാര്‍ട്ടി അന്വേഷണക്കമ്മീഷനേയും കെപിസിസി അധ്യക്ഷനേയും അറിയിച്ചിരുന്നു. പാലോട് രവിക്കെതിരെ നടപടി എടുത്തില്ലെങ്കിലും അംഗീകാരം കൊടുക്കരുതെന്ന് ആവശ്യപ്പെട്ടിരുന്നു. പക്ഷേ അത് പാര്‍ട്ടി കണക്കിലെടുത്തില്ലെന്നും പ്രശാന്ത് പറഞ്ഞു. തന്നോടപ്പമുള്ള പ്രവര്‍ത്തകരെ ഭീഷണിപ്പെടുത്തുകയാണെന്ന് പ്രശാന്ത് ആരോപിച്ചു.
താന്‍ മുപ്പത് വര്‍ഷത്തെ കോണ്‍ഗ്രസ് ജീവിതം അവസാനിപ്പിക്കുകയാണ്. ഏത് പാര്‍ട്ടിയുമായി സഹകരിക്കണമെന്ന് ആലോചിച്ചിട്ടില്ലെന്നും പ്രശാന്ത് വ്യക്തമാക്കി. അച്ചടക്ക ലംഘനത്തിന് പ്രശാന്തിനെ ഇന്നലെ കോണ്‍ഗ്രസ് പാര്‍ട്ടിയില്‍ നിന്നും പുറത്താക്കിയിരുന്നു.
പ്രതികരിക്കാൻ ഇവിടെ എഴുതുക: