കോഴിക്കോട്: ഗോവയിൽ നിന്നും കേരളത്തിലേക്ക് ലഹരിക്കടത്ത് നടത്തുന്ന സംഘത്തിലെ സൂത്രധാരനെ അറസ്റ്റ് ചെയ്തു. ഗോവയിൽ നിന്നും കേരളത്തിലേക്ക് മയക്കുമരുന്നുകൾ കൊറിയർ മുഖേന അയച്ചിരുന്ന തൃശ്ശൂർ സ്വദേശി സാക്കിർ ഹുസൈനാണ് (34) അറസ്റ്റിലായത്. കോഴിക്കോട് എക്സൈസ് ക്രൈം ബ്രാഞ്ച് ആണ് സാക്കിറിനെ അറസ്റ്റ് ചെയ്തത്.
അഞ്ച് വർഷത്തിലധികമായി ഗോവയിൽ താമസിച്ച് മയക്കു മരുന്നുകളുടെ ഇടപാടുകൾ നടത്തി വരികയായിരുന്നു സക്കീർ ഹുസൈന്‍. ഡി.എം.എ, എൽ.എസ്.ഡി. സ്റ്റാമ്പുകള്‍, ഹാഷിഷ്, കഞ്ചാവ് എന്നിവയാണ് ഗോവയില്‍ നിന്ന് ഇയാൾ കോഴിക്കോടേക്ക് എത്തിച്ചിരുന്നത്.
മൂന്ന് മാസം മുമ്പ് ഗോവയിലെ സിയോളിം എന്ന സ്ഥലത്ത് വെച്ച് അപകടത്തില്‍ പെട്ടതിനെ തുടര്‍ന്ന് ചികിത്സക്കായി സാക്കിര്‍ ഹുസൈന്‍ നാട്ടിലെത്തിയിരുന്നു. ഇത് മനസിലാക്കി ക്രൈം ബ്രാഞ്ച് സംഘം നടത്തിയ നീക്കത്തിലാണ് ഇയാള്‍ കുടങ്ങിയത്. ഗോവയില്‍ സാക്കി എന്ന പേരില്‍ അറിയപ്പെടുന്ന സാക്കിര്‍ ഹുസൈന്‍ ബിരുദധാരിയാണ്.
പ്രതികരിക്കാൻ ഇവിടെ എഴുതുക: