കോഴിക്കോട്: സ്വര്‍ണക്കടത്തിന് നേതൃത്വം കൊടുത്ത അര്‍ജുന്‍ ആയങ്കിയുടെയും കൊടി സുനിയുടെയും അഴിയൂരിലെ രഹസ്യ വീട്ടിലെ തൊണ്ടിസാധനങ്ങള്‍ കണ്ണൂര്‍ ജില്ലയിലേക്ക് കടത്തി. കഴിഞ്ഞ രണ്ട് ദിവസങ്ങളിലായി ചുവന്ന ബ്രസ കാറിലാണ് വീട്ടില്‍ നിന്നുള്ള സാധനങ്ങള്‍ കണ്ണൂരിലേക്ക് കടത്തിയത്. രാമനാട്ടുകര സംഭവത്തിന് ശേഷം കോഴിക്കോട്, കണ്ണൂര്‍ ജില്ലയുടെ വിവിധ ഭാഗങ്ങളില്‍ ഈ വാഹനം കണ്ടിരുന്നതായി വിവരമുണ്ട്.
അഴിയൂരിലെ വാടക വീട്ടില്‍ നിന്ന് സാധനങ്ങള്‍ കടത്തുന്ന വിവരം ചോമ്പാല പോലീസിന് ലഭിച്ചെങ്കിലും പരിശോധന നടത്താനോ തടയാനോ തയാറായില്ല. പരോളിലുള്ള കൊടി സുനിയും കണ്ണൂര്‍ ജില്ലയിലെ ചില സിപിഎം പ്രാദേശിക നേതാക്കളും അഴിയൂരില്‍ നിന്നുള്ള സാധനക്കടത്തിന് നേതൃത്വം നല്‍കിയെന്നാണ് വിവരം. പോലീസ് പരിശോധന ഉണ്ടാവില്ലെങ്കിലും സ്വര്‍ണക്കടത്തില്‍ അന്വേഷണം നടത്തുന്ന കസ്റ്റംസ് അഴിയൂരിലെ വീട്ടില്‍ എത്തുമെന്ന ആശങ്കയെത്തുടര്‍ന്നാണ് സാധനങ്ങള്‍ കണ്ണൂരിലേക്ക് മാറ്റിയത്.
കണ്ണൂരിലെ സിപിഎം ക്രിമിനലുകളുടെ കേന്ദ്രമായ പടന്നക്കരയിലേക്കാണ് സാധനങ്ങള്‍ എത്തിച്ചിരിക്കുന്നത്.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: