കൊച്ചി: കൂടുതല്‍ സത്രീധനം ആവശ്യപ്പെട്ട് ആലുവ ആലങ്ങാട് ഗര്‍ഭിണിയെ മര്‍ദ്ദിച്ച കേസില്‍ ഒരാള്‍ പിടിയില്‍. യുവതിയുടെ ഭര്‍ത്താവ് ജൗഹറിന്റെ സുഹൃത്താണ് പിടിയിലായത്. കേസില്‍ ആറാം പ്രതിയാണ് ഇയാള്‍. പ്രതികളായ മറ്റ് അഞ്ച് പേര്‍ ഇപ്പോഴും ഒളിവിലാണ്.
സത്രീധനം കൂടുതല്‍ ആവശ്യപ്പെട്ട് ആലുവ ആലങ്ങാട് സ്വദേശി നഹ്‌ലത്തിനാണ് ഭര്‍തൃവീട്ടില്‍ ക്രൂരമായ പീഡനം അനുഭവിക്കേണ്ടി വന്നത്. കഴിഞ്ഞ ദിവസം സ്ഥല വില്‍പ്പനയുമായി ബന്ധപ്പെട്ട് നഹ്‌ലത്തിന്റെ പിതാവ് സലീമിനെ വിളിച്ചുവരുത്തിയിരുന്നു. തുടര്‍ന്ന് ജൗഹറും സലീമും തമ്മില്‍ വാക്ക് തര്‍ക്കവും ഉണ്ടായി. തുടര്‍ന്ന് ജൗഹറും സുഹൃത്തുക്കളും ചേര്‍ന്ന് നഹ്‌ലത്തിനേയും സലീമിനേയും മര്‍ദ്ദിക്കുകയായിരുന്നു.
നഹ്‌ലത്തിനെ സ്ത്രീധനത്തിന്റെ പേരില്‍ ഭര്‍ത്താവും വീട്ടുകാരും പീഡിപ്പിച്ചിരുന്നതായി പോലീസ് അന്വേഷണത്തില്‍ കണ്ടെത്തിയിട്ടുണ്ട്. പ്രതികളെ അറസ്റ്റു ചെയ്യാന്‍ റൂറല്‍ എസ്പി അനുമതി നല്‍കി.
കഴിഞ്ഞ ഒക്ടോബറിലാണ് പറവൂര്‍ മന്നം സ്വദേശി ജൗഹര്‍ നഹ്‌ലത്തിനെ വിവാഹം കഴിച്ചത്. നഹ്‌ലത്തിന്റെ ഭര്‍ത്താവ് ജൗഹര്‍, ജൗഹറിന്റെ അമ്മ സുബൈദ, ജൗഹറിന്റെ സഹോദരിമാരായ ഷബീന, ഷറീന, ജൗഹറിന്റെ സുഹൃത്ത് മുഹതാസ് എന്നിവര്‍ക്കെതിരെയാണ് പോലീസ് കേസെടുത്തിട്ടുള്ളത്. ഗാര്‍ഹിക പീഡന വകുപ്പ്് ചുമത്തി ആലങ്ങാട് സിഐ എഫ്‌ഐആര്‍ സമര്‍പ്പിച്ചിട്ടുണ്ട്.
പ്രതികരിക്കാൻ ഇവിടെ എഴുതുക: