ന്യൂദല്‍ഹി: രാജ്യത്ത് 551 ഓക്‌സിജന്‍ പ്ലാന്റുകള്‍ സ്ഥാപിക്കും. ഇതിനായി പിഎം കെയേഴ്‌സ് ഫണ്ടില്‍നിന്ന് പണം അനുവദിച്ചു. രാജ്യത്തുടനീളമുള്ള പൊതുജന ആരോഗ്യ കേന്ദ്രങ്ങളിലായിരിക്കും പ്രഷര്‍ സ്വിംഗ് അഡ്‌സോര്‍പ്ഷന്‍ മെഡിക്കല്‍ ഓക്‌സിജന്‍ ഉത്പാദക പ്ലാന്റുകള്‍ സ്ഥാപിക്കുക. കോവിഡ് വ്യാപനത്തിനിടെ ആശുപത്രികള്‍ക്ക് ഓക്‌സിജന്‍ ലഭ്യത വര്‍ധിപ്പിക്കണമെന്ന് പ്രധാനമന്ത്രി നരേന്ദ്രമോദി നിര്‍ദേശിച്ചതിന് പിന്നാലെയാണ് പുതിയ തീരുമാനം വരുന്നത്.
ഈ ഓക്‌സിജന്‍ പ്ലാന്റുകള്‍ക്കായി പിഎം കെയേഴ്‌സ് ഫണ്ട് തത്വത്തില്‍ അംഗീകാരം നല്‍കിയിട്ടുണ്ടെന്ന് പ്രധാനമന്ത്രിയുടെ ഓഫിസ് പ്രസ്താവനയില്‍ അറിയിച്ചു. പ്രധാനമന്ത്രിയുടെ നിര്‍ദേശം അനുസരിച്ച് കഴിയുന്നത്ര വേഗത്തില്‍ പ്ലാന്റുകള്‍ പ്രവര്‍ത്തന സജ്ജമാക്കും. ജില്ലാതലങ്ങളില്‍ ഇവ ഓക്‌സിജന്‍ ലഭ്യത ഗണ്യമായി കൂട്ടുമെന്ന് പിഎംഒ കൂട്ടിച്ചേര്‍ത്തു.
സംസ്ഥാനങ്ങളിലെയും കേന്ദ്രഭരണ പ്രദേശങ്ങളിലെയും ജില്ലാ ആസ്ഥാനങ്ങളിലെ സര്‍ക്കാര്‍ ആശുപത്രികളിലായിരിക്കും പ്ലാന്റുകള്‍ സ്ഥാപിക്കുക. കേന്ദ്ര ആരോഗ്യമന്ത്രാലയം വഴി ഇതു നടപ്പാക്കുമെന്നും പിഎംഒ അറിയിച്ചു. പൊതുജന ആരോഗ്യ ഇടങ്ങളില്‍ 162 പ്രഷര്‍ സ്വിംഗ് അഡ്‌സോര്‍പ്ഷന്‍ മെഡിക്കല്‍ ഓക്‌സിജന്‍ ഉത്പാദക പ്ലാന്റുകള്‍ സ്ഥാപിക്കാന്‍ 201.58 കോടി രൂപ പിഎം കെയേഴ്‌സ് ഫണ്ട് ഈ വര്‍ഷം നേരത്തേ അനുവദിച്ചിരുന്നു.
പ്രതികരിക്കാൻ ഇവിടെ എഴുതുക: