ന്യൂദല്‍ഹി : കോണ്‍ഗ്രസ് നേതാവ് പ്രിയങ്ക വാദ്രയ്‌ക്ക് പിന്നാലെ ട്വിറ്ററില്‍ അബദ്ധം പിണഞ്ഞ് ശശി തരൂര്‍ എംപി. മുന്‍ ലോക് സഭാ സ്പീക്കര്‍ സുമിത്രാ മഹാജന്‍ മരണപ്പെട്ടുവെന്നും അനുശോചനം അറിയിച്ചുകൊണ്ടുമായിരുന്നു ശശി തരൂരിന്റെ ട്വീറ്റ്. സമൂഹ മാധ്യമങ്ങളില്‍ ഇതിനെതിരെ പരിഹാസങ്ങള്‍ ഉയരുകയും ബിജെപിയും സുമിത്രാ മഹാജനും രംഗത്ത് എത്തിയതോടെ ശശി തരൂര്‍ ട്വീറ്റ് പിന്‍വലിച്ചു.
വിശ്വസനീയം എന്ന് കരുതാവുന്ന ഇടത്ത് നിന്നാണ് തനിക്ക് മരിച്ചതായുള്ള വാര്‍ത്ത ലഭിച്ചത്. മുന്‍ ട്വീറ്റ് പിന്‍വലിക്കുന്നതില്‍ സന്തോഷമേ ഉള്ളുവെന്നും ശശി തരൂര്‍ പറഞ്ഞു. ഇത്തരത്തില്‍ വ്യാജ വാര്‍ത്ത പ്രചരിപ്പിക്കുന്നത് വിഷമമുണ്ടാക്കുന്ന കാര്യമാണെന്നും ട്വീറ്റ് പിന്‍വലിച്ചുകൊണ്ട് അദ്ദേഹം അറിയിച്ചു.
സുമിത്രാ മഹാജന്‍ പൂര്‍ണ ആരോഗ്യവതിയാണെന്നറിയിച്ച് ബിജെപി ജനറല്‍ സെക്രട്ടറി കൈലാഷ് വിജയ്വര്‍ഗീയയും രംഗത്തെത്തി. കൊറോണ ബാധിതയായിരുന്ന സുമിത്രാ മഹാജന്‍ രോഗമുക്തി നേടിയെന്നും ഡോക്ടര്‍മാരുടെ നിര്‍ദ്ദേശപ്രകാരം അവര്‍ നിരീക്ഷണത്തില്‍ മാത്രമാണെന്നും. വിജയ് വര്‍ഗീയ ശശി തരൂരിന് മറുപടി നല്‍കി.
എന്നാല്‍ തന്റെ മരണം പ്രഖ്യാപിക്കാന്‍ എന്ത് അടിയന്തര സാഹചര്യമായിരുന്നു നിലവിലുണ്ടായിരുന്നതെന്നാണ് സുമിത്ര മഹാജന്‍ ശശി തരൂരിനോട് പ്രതികരിച്ചത്. കുറഞ്ഞ പക്ഷം ആശുപത്രിയിലെങ്കിലും അന്വേഷിക്കാമായിരുന്നു. തരൂരിന് തന്റെ കുടുംബം മറുപടി നല്‍കിയിട്ടുണ്ടെന്നും അവര്‍ കൂട്ടിച്ചേര്‍ത്തു.
പ്രതികരിക്കാൻ ഇവിടെ എഴുതുക: