തിരുവനന്തപുരം: സംസ്ഥാനത്ത് തെരഞ്ഞെടുപ്പ് ചൂടിനൊപ്പം അന്തരീക്ഷ താപനിലയും കൂടുന്നു. കടുത്ത ചൂടിൽ കേരളം വലയുകയാണ്. മാർച്ച് ഒന്ന് മുതൽ മൂന്നു മാസക്കാലമാണ് കേരളത്തിൽ വേനൽക്കാലമായി കണക്കാക്കുന്നത്. മിക്ക ജില്ലകളിലും ഉയർന്ന താപനില ശരാശരിയിലും രണ്ട് ഡിഗി വരെ ഉയർന്നുകഴിഞ്ഞു.
സംസ്ഥാനത്ത് ഇപ്പോള്‍ തന്നെ 35 ഡിഗ്രി സെല്‍ഷ്യസിനോടടുത്ത് ചൂട് അനുഭവപ്പെടുന്നുണ്ട്. വരും ദിവസങ്ങളില്‍ ചൂട് വീണ്ടും വര്‍ധിക്കുമെന്നാണ് കരുതുന്നത്. ഭൂമധ്യ രേഖയ്‌ക്ക് സമീപമുള്ള കിഴക്കൻ പസഫിക് സമുദ്രത്തിലും മധ്യ പസഫിക് സമുദ്രത്തിലും കടലിന്റെ ചൂട് സാധാരണയിലും കുറയുന്ന നീന പ്രതിഭാസം ഏപ്രിലോടെ കൂടുതൽ ദുർബമായേക്കും. ഇന്ത്യൻ മഹാസമുദ്രത്തിലെ താപനില സാധാരണ നിലയിൽ തുടർന്നേക്കുമെന്നാണ് അന്താരാഷ്‌ട്ര കാലവസ്ഥ ഏജൻസികളുടെ വിലയിരുത്തൽ.
തീരദേശ സംസ്ഥാനമായതിനാൽ കേരളത്തിൽ അന്തരീക്ഷ ആർദ്രത ഉയർന്നതാണ്. അതിനാൽ വേനൽക്കാലത്ത് താപനില ഉയരുന്നതോടെ, ചൂട് ആനുപാതികമായി ഉയരുകയും മനുഷ്യർക്കും മറ്റ് ജീവജാലങ്ങൾക്കും ആരോഗ്യപ്രശ്നങ്ങളും അസ്വസ്ഥതയുമുണ്ടാക്കും. വേനൽക്കാല ദുരന്ത സാധ്യതകൾ ലഘൂകരിക്കുന്നതിനും പ്രതിരോധിക്കുന്നതിനും സംസ്ഥാന ദുരന്ത നിവാരണ അതോറിറ്റി പൊതുജനങ്ങൾക്കായി പരിശീലന പരിപാടി സംഘടിപ്പിക്കും.
അതിനിടെ, സംസ്ഥാനത്ത് വൈദ്യുതി ഉപയോഗം കുത്തനെ ഉയര്‍ന്നു. 81 ദശലക്ഷം യൂനിറ്റാണ് കഴിഞ്ഞ ദിവസത്തെ ഉപഭോഗം. സംസ്ഥാനത്ത് ശനിയാഴ്ചത്തെ വൈദ്യുതി ഉപയോഗം 81.84 ദശലക്ഷം യൂണിറ്റ്. 2019 മെയ് 23ന് പാര്‍ലമെന്റ് തെരഞ്ഞെടുപ്പ് വോട്ടെണ്ണല്‍ ദിനത്തിലാണ് വൈദ്യുത ഉപഭോഗം സര്‍വകാല റെക്കോഡിലെത്തിയത്, 88.34 ദശലക്ഷം യൂനിറ്റ്. എന്നാല്‍ പതിവില്ലാതെ ഇത്തവണ ഫെബ്രുവരിയില്‍ തന്നെ ഉപഭോഗം കുത്തനെ കൂടിയിരിക്കുകയാണ്.
വൈദ്യുതി ഉപയോഗം കൂടിയതോടെ ഉത്പാദനവും റെക്കോഡ് നിരക്കിലായി. ഇടുക്കി മൂലമറ്റത്ത് നിന്നുള്ള വൈദ്യുതോല്‍പാദനം പരമാവധിയിലാണ്. ആറ് ജനറേറ്ററുകളും പ്രവര്‍ത്തിപ്പിക്കുന്നു. 14.28 ദശലക്ഷം യൂണിറ്റാണ് ശനിയാഴ്ചത്തെ ഉത്പാദനം. സംസ്ഥാനത്തിന് പുറത്ത് നിന്ന് ആവശ്യത്തിന് വൈദ്യുതി കൊണ്ടുവന്നാണ് ഉപഭോഗം പിടിച്ച് നിര്‍ത്തുന്നത്. ശനിയാഴ്ച കേന്ദ്രഗ്രിഡില്‍ നിന്ന് വാങ്ങിയത് 53.8 ദശലക്ഷം യൂണിറ്റ് വൈദ്യുതി. തിരഞ്ഞെടുപ്പ് കാലം എത്തിയതോടെ വരും ദിവസങ്ങളില്‍ വൈദ്യുതി ഉപയോഗം ഇനിയും കൂടാനാണ് സാധ്യത.
പ്രതികരിക്കാൻ ഇവിടെ എഴുതുക: