ലണ്ടന്‍: പ്രീമിയര്‍ ലീഗ് ടീമുകളായ ടോട്ടനത്തിനും ആഴ്‌സണലിനും യൂറോപ്പ ലീഗില്‍ വിജയത്തുടക്കം. ഇറ്റാലിയന്‍ ടീമായ എസി മിലാനും ജയത്തോടെ അരങ്ങേറി. ടോട്ടനം ആദ്യ മത്സരത്തില്‍ മടക്കമില്ലാത്ത മൂന്ന് ഗോളുകള്‍ക്ക് ലാസ്‌ക്കിനെ പരാജയപ്പെടുത്തി. പതിനെട്ടാം മിനിറ്റില്‍ ലുകാസ് മൗറ ടോട്ടനത്തിന് ലീഡ് നേടിക്കൊടുത്തു. ആന്ദ്രെസ് സെല്‍ഫ് ഗോള്‍ വഴങ്ങിയതോടെ ടോട്ടനം 2-0ന് മുന്നിലെത്തി. കളിയവസാനിക്കാന്‍ ആറു മിനിറ്റുള്ളപ്പോള്‍ സണ്‍ ഹിയൂങ് മിന്‍ മൂന്നാം ഗോളും നേടി ടോട്ടനത്തിന് വിജയം സമ്മാനിച്ചു.
തുടര്‍ച്ചയായി നാലാം തവണ യൂറോപ്പ ലീഗില്‍ മത്സരിക്കുന്ന ആഴസണല്‍ ഒന്നിനെതിരെ രണ്ട് ഗോളുകള്‍ക്ക് റാപ്പിഡ് വിയന്നയെ തോല്‍പ്പിച്ചു. അമ്പത്തിയൊന്നാം മിനിറ്റില്‍ ഫൗണ്ടാസ് റാപ്പിഡ് വിയന്നയെ മുന്നിലെത്തിച്ചു. തകര്‍ത്തുകളിച്ച ആഴ്‌സണല്‍ ഡേവിഡ് ലൂയിസിന്റെ ഗോളില്‍ ഒപ്പം എത്തി. 74-ാം മിനിറ്റില്‍ ഔബാമേയാങ് ഗോളടിച്ചതോടെ വിജയവും സ്വന്തമാക്കി.
എസി മിലാന്‍ ആദ്യ മത്സരത്തില്‍ ഒന്നിനെതിരെ മൂന്ന് ഗോളുകള്‍ക്ക് സെല്‍റ്റിക്കിനെ തോല്‍പ്പിച്ചു. റോമ ഒന്നിനെതിരെ രണ്ട് ഗോളുകള്‍ക്ക് യങ് ബോയ്‌സിനെ പരാജയപ്പെടുത്തി. ഗ്രാനഡ ഒന്നിനെതിരെ രണ്ട് ഗോളുകള്‍ക്ക് പിഎസ്‌വിയെ അട്ടിമറിച്ചു. പ്രീമിയര്‍ ലീഗ് ടീമായ ലെസ്റ്റര്‍ സിറ്റി ഏപക്ഷീയമായ മൂന്ന് ഗോളുകള്‍ക്ക് സോറിയ ലുഹാന്‍സിനെ കീഴടക്കി.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: