തൃശൂര്‍: കൊടുങ്ങല്ലൂര്‍ എസ്എന്‍പുരം പൊരിബസാറിലെ വാടക വീട്ടില്‍ യുവാവ് കൊല്ലപ്പെട്ട സംഭവത്തില്‍ പ്രതി അറസ്റ്റില്‍. മേത്തല കാരയില്‍ അരുണ്‍(35) ആണ്് പിടിയിലായത്. കൊല്ലപ്പെട്ട രാജേഷിന്റെ കൂടെ വാടക വീട്ടിലാണ് അരുണും താമസിച്ചിരുന്നത്. ആറിന് പുലര്‍ച്ചേയാണ് വാടക വീട്ടിലെ ഹാളിനകത്ത് രാജേഷിനെ മരിച്ച നിലയില്‍ കണ്ടെത്തിയത്. രാജേഷും അരുണും തമ്മിലുള്ള വാക്കുതര്‍ക്കത്തിനു ശേഷം ഉണ്ടായ മര്‍ദ്ദനത്തില്‍ രാജേഷിനേറ്റ മാരകമായ മുറിവില്‍ നിന്നുണ്ടായ ആന്തരിക രക്തസ്രാവമാണ് മരണകാരണം.
രാജേഷിന്റെ മരണത്തിന് ശേഷം സ്ഥലത്ത്് പോലീസ് കാവലേര്‍പ്പെടുത്തി. സയന്റിഫിക്ക് ഓഫീസറുടേയും ഫിംഗര്‍പ്രിന്റ് എക്‌സ്‌പേര്‍ട്ടിന്റെയും ഡോഗ് സ്‌ക്വാഡിന്റെയും നേതൃത്വത്തില്‍ പരിശോധന നടത്തി. രാജേഷിന്റെ കൂട്ടുകാരും ഒപ്പം താമസിക്കുന്നവരും പോലീസ് നിരീക്ഷണത്തിലായിരുന്നു. മെഡിക്കല്‍ കോളേജില്‍ അസി. ഫോറന്‍സിക് സര്‍ജന്‍ ഡോ. ഹിതേഷ് ശങ്കറിന്റെ നേതൃത്വത്തില്‍ നടത്തിയ പോസ്റ്റ്‌മോര്‍ട്ടത്തിലാണ് കൊലപാതകമാണെന്ന് തെളിഞ്ഞത്. മതിലകം സിഐ അനന്തകൃഷ്ണനാണ് പ്രതിയെ അറസ്റ്റു ചെയ്തത്. തൃശൂര്‍ റൂറല്‍ എസ്പി ആര്‍. വിശ്വനാഥന്റെ നിര്‍ദ്ദേശാനുസരണം ഡിവൈഎസ്പി ഫേമസ് വര്‍ഗീസിന്റെ നേതൃത്വത്തില്‍ ഉള്ള അന്വേഷണ സംഘത്തില്‍ എസ്‌ഐമാരായ സൂരജ്, തോമസ്, ഉണ്ണികൃഷ്ണന്‍, ക്ലീസണ്‍ സിപിഒമാരായ മനോജ്, എയ്ഞ്ചല്‍ എന്നിവരാണ് ഉണ്ടായിരുന്നത്.
ഒരുമിച്ച് ജീവിച്ചു, ഒടുവില്‍ ജീവനെടുത്തു
പൊരി ബസാര്‍ വാടക വീട്ടില്‍ കൊല ചെയ്യപ്പെട്ട രാജേഷും പ്രതി അരുണും മൂന്നുവര്‍ഷത്തോളമായി ഒരുമിച്ചാണ് താമസം. രാജേഷ് 11 വര്‍ഷത്തോളമായി ഭാര്യയുമായും പ്രതി അരുണ്‍ വീട്ടുകാരുമായും പിണങ്ങി നില്‍ക്കുകയായിരുന്നു. രണ്ടു പേരും കെട്ടിട നിര്‍മ്മാണ തൊഴിലാളികളാണ്. പലപ്പോഴും വഴക്കു കൂടാറുള്ള ഇവര്‍ തിങ്കളാഴ്ച രാത്രി ഭക്ഷണം വെക്കുന്നതുമായി ബന്ധപ്പെട്ട് ഉണ്ടായ തര്‍ക്കത്തില്‍ അരുണ്‍ രാജേഷിനെ മാരകമായി മര്‍ദ്ദിക്കുകയായിരുന്നു. മര്‍ദ്ദനത്തില്‍ ആന്തരികമായി മുറിവേറ്റ രാജേഷ് വീടിന്റെ ഹാളിനുള്ളില്‍ കിടന്നാണ് മരിച്ചത്.
പ്രതികരിക്കാൻ ഇവിടെ എഴുതുക: