വെഞ്ഞാറമൂട്: നെല്ലനാട് കോണ്‍ഗ്രസ് ഭവനും പ്രിയദര്‍ശിനി സഹകരണ സംഘവും അടിച്ചു തകര്‍ത്ത് തീയിട്ട് നശിപ്പിച്ച സംഭവത്തില്‍ രണ്ട് പേര്‍ അറസ്റ്റില്‍. വെഞ്ഞാറമൂട് കാവറ എ.ജെ. ഭവനില്‍ അരവിന്ദ് (27), പാലത്തറ വിശാഖ് ഭവനില്‍ വിശാഖ് (27) എന്നിവരെയാണ് വെഞ്ഞാറമൂട് പോലീസ് ഇന്‍സ്‌പെക്ടര്‍ വി.കെ. വിജയരാഘവന്റെ നേതൃത്വത്തിലുള്ള സംഘം അറസ്റ്റ് ചെയ്തത്. അറസ്റ്റിലായവര്‍ ഡിവൈഎഫ്ഐ പ്രവര്‍ത്തകരാണെന്നും കൂടുതല്‍ പേരെ കണ്ടെത്താനുള്ള ശ്രമം തുടങ്ങിയതായും പോലീസ് പറഞ്ഞു.
കഴിഞ്ഞ 31 നാണ് കോണ്‍ഗ്രസ് ഭവനും ഓഫീസിനോട് അനുബന്ധിച്ചു പ്രവര്‍ത്തിക്കുന്ന പ്രിയദര്‍ശിനി സഹകരണ സംഘവും ഒരു സംഘം ആളുകള്‍ ആക്രമിക്കുകയും പെട്രോള്‍ ഒഴിച്ച് തീയിടുകയും ചെയ്തത്. തേമ്പാംമൂട്ടില്‍ കൊല്ലപ്പെട്ട ഡിവൈഎഫ്ഐ പ്രവര്‍ത്തകരുടെ വിലാപയാത്രയ്‌ക്ക് പിന്നാലെ ഡിവൈഎഫ്ഐ നടത്തിയ പ്രകടനത്തിനിടയിലാണ് പാര്‍ട്ടി ഓഫീസ് ആക്രമിക്കപ്പെട്ടത്. തുടര്‍ന്ന് സിസിടിവി ദൃശ്യങ്ങളടക്കം കോണ്‍ഗ്രസ് മണ്ഡലം കമ്മറ്റി നല്‍കിയ പരാതിയുടെ അടിസ്ഥാനത്തില്‍ പോലീസ് കേസെടുത്തു നടത്തിയ അന്വേഷണത്തിലാണ് ഇവര്‍ അറസ്റ്റിലായത്. കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.
പ്രതികരിക്കാൻ ഇവിടെ എഴുതുക: