തിരുവനന്തപുരം: മുഖ്യമന്ത്രിയുടെ നൂറുദിന പദ്ധതി തെരഞ്ഞെടുപ്പ് മുന്നില്‍ക്കണ്ടുള്ള തട്ടിപ്പ്. സാമൂഹിക ക്ഷേമ പെന്‍ഷന്‍ 100 രൂപ വര്‍ധിപ്പിക്കുമെന്നുള്ള പ്രഖ്യാപനം രണ്ടു വര്‍ഷത്തിനു മുമ്പുള്ള ബജറ്റ് പ്രഖ്യാപനത്തിലേത്.
അഞ്ഞൂറ് കുട്ടികളില്‍ കൂടുതല്‍ പഠിക്കുന്ന സ്‌കൂളുകളില്‍ കിഫ്ബിയുടെ ധനസഹായത്തോടെ സ്മാര്‍ട്ട് സ്‌കൂളുകള്‍ പണിയുമെന്ന വാഗ്ദാനം വിദ്യാലയങ്ങളെ പുനരുദ്ധരിക്കാന്‍ കേന്ദ്ര സര്‍ക്കാര്‍ നല്‍കിയ പണത്തില്‍ നിന്ന്. ഇത് തുടങ്ങിയിട്ട് ഒരു വര്‍ഷം പന്നിട്ടു. കൂടാതെ സ്മാര്‍ട്ട് സ്‌കൂള്‍, 45,000 ഡിജിറ്റല്‍ ക്ലാസ് മുറികള്‍ ഇവയെല്ലാം ഉദ്ഘാടനത്തിന് കാത്ത് കിടക്കുന്നവ. ഇതും സര്‍ക്കാരിന്റെ നൂറുദിന വാഗ്ദാനമെന്ന നിലയിലാകും തദ്ദേശ തെരഞ്ഞെടുപ്പിന് മുമ്പ് ഉദ്ഘാടനം നടത്തുക.
റോഡ് വികസനത്തെ പറ്റി പറയുന്നതില്‍ കൂടുതലും ഇപ്പോള്‍ നടന്നുകൊണ്ടിരിക്കുന്ന പദ്ധതി. നൂറുദിനം കൊണ്ട് കശുവണ്ടി മേഖലയില്‍ 3,000 പേര്‍ക്ക് തൊഴില്‍ നല്‍കുമെന്ന് പറയുന്ന സര്‍ക്കാര്‍ പൂട്ടിക്കിടക്കുന്ന കശുവണ്ടി ഫാക്ടറികളെ പുനരുദ്ധരിക്കുന്നതിന് നാളിതുവരെ യാതൊരു നടപടിയും സ്വീകരിച്ചിട്ടില്ല.
തീരദേശ വികസനത്തിനും ഹാര്‍ബര്‍ വികസനത്തിനുമായി നിരവധി പദ്ധതികള്‍ പ്രഖ്യാപിച്ച മുഖ്യമന്ത്രി, ഓഖി ദുരന്തത്തെ തുടര്‍ന്ന് നടപ്പിലാക്കേണ്ട പദ്ധതികള്‍ പോലും നടപ്പാക്കിയിട്ടില്ല. കൊവിഡിനെ നേരിടാന്‍ 20,000 കോടിയുടെ പദ്ധതികള്‍ പ്രഖ്യാപിച്ചിതിനു പിന്നാലെയാണ് നൂറുദിന പദ്ധതികളും. 20,000 കോടി രൂപയുടെ പാക്കേജ് എങ്ങുമെത്തിയില്ല.
കുട്ടനാട്, ഇടുക്കി, വയനാട് പാക്കേജ് എന്നിവയും ഇതുവരെയും വെളിച്ചം കണ്ടില്ല. ചില പദ്ധതികളാകട്ടെ 400 മുതല്‍ 500 കോടി രൂപ വരെയുള്ളത്. നൂറുദിന കര്‍മ്മ പരിപാടിയില്‍ ഇവയൊക്കെ സ്ഥാനം പിടിച്ചതില്‍ ആശ്ചര്യപ്പെടുകയാണ് പൊതുമരാമത്ത് വിഭാഗം. ധനമന്ത്രി തോമസ് ഐസക്കിന്റെ കഴിഞ്ഞ രണ്ടു വര്‍ഷത്തെ ബജറ്റ് പ്രസംഗത്തിലെ ചില ഭാഗങ്ങള്‍ അടര്‍ത്തിയെടുത്താണ് മുഖ്യമന്ത്രി നൂറുദിന പരിപാടികള്‍ തട്ടിക്കൂട്ടിയതെന്നും ആക്ഷേപമുയരുന്നു.
ജന്മഭൂമി ഓണ്‍ലൈന്‍
പ്രതികരിക്കാൻ ഇവിടെ എഴുതുക: