മീൻ വണ്ടിയിലെത്തിച്ച കഞ്ചാവ് പിടികൂടി

തലശ്ശേരി: മീൻ വണ്ടിയിൽ എത്തിച്ച് ഇടപാടുകാർക്ക് കൈമാറുന്നതിനിടെ കഞ്ചാവ് കടത്തുകാരെ നാട്ടുകാർ പിടികൂടി എക്സൈസിന് കൈമാറി. ഇന്നലെ രാവിലെ ഒമ്പതേകാലോടെ കൊടുവള്ളി പുതിയ പാലത്തിന് സമീപം പേൾവ്യൂ ഹോട്ടലിന് എതിർവശത്താണ് കഞ്ചാവ് മാഫിയ സംഘം നാട്ടുകാരുടെ പിടിയിലായത്. 

കെ.എൽ.14. ഡബ്ളിയു.9291 എയ്സ് വണ്ടിയിലുണ്ടായ കാസർകോഡ് ഉപ്പള സ്വദേശി കിരൺ, സുഹൃത്തും സഹായിയുമായ ബിപിൻ എന്നിവരാണ് കുടുങ്ങിയത്. എക്സൈസ് ഉദ്യോഗസ്ഥർ സ്ഥലത്ത് എത്തുന്നതിനിടെ ബിപിൻ കുതറി ഓടി തൊട്ടടുത്ത കൊടുവള്ളി പുഴയിൽ ചാടി. നാലര കിലോ കഞ്ചാവ് പ്രതികളിൽ നിന്നും കണ്ടെടുത്തിട്ടുണ്ട്. ഹൈഡ്രോളിക് സംവിധാനത്തിൽ പ്രസ് ചെയ്ത് കേക്ക് രൂപത്തിൽ തയ്യാറാക്കിയ ഉണക്ക ക്കഞ്ചാവാണ് കസ്റ്റഡിയിൽ ലഭിച്ചതെന്ന് എക്സൈസ് ഉദ്യോഗസ്ഥർ പറഞ്ഞു. 

കാസർകോഡ് കേന്ദ്രീകരിച്ച് ലഹരി ഇടപാട് നടത്തുന്ന വൻ റാക്കററിലെ കണ്ണികളാണ് തലശ്ശേരിയിലെത്തിയതെന്ന് കരുതുന്നു. ഇവരിൽ നിന്നും കഞ്ചാവ് പൊതി ഏറ്റുവാങ്ങാൻ എത്തിയ തലശ്ശേരിക്കാരെ എക്സൈസ് തിരിച്ചറിഞ്ഞിട്ടുണ്ട്.