ന്യൂദല്‍ഹി : അയോധ്യയില്‍ രാമക്ഷേത്ര നിര്‍മാണത്തിന് തുടക്കം കുറിച്ചതിന് പിന്നാലെ രാജ്യത്ത് വര്‍ഗ്ഗീയ കലാപമുണ്ടാക്കാന്‍ പാക് ചാര സംഘടനയായ ഐഎസ്‌ഐ നീക്കം തുടങ്ങി. ജനങ്ങളെ വര്‍ഗ്ഗീയ കലാപത്തിലേക്ക് ഐഎസ്‌ഐ പ്രേരിപ്പിക്കുന്നതായാണ് ആരോപണം.
വര്‍ഗ്ഗീയ കലാപത്തിന് ആഹ്വാനം ചെയ്ത് ലഖ്‌നൗവിലെ ജനങ്ങള്‍ക്ക് ഫോണ്‍ കോളുകള്‍ എത്തിയതായും റിപ്പോര്‍ട്ടുണ്ട്. ഇതുമായി ബന്ധപ്പെട്ട് ഹസ്രത്ത് സ്റ്റേഷനില്‍ പരാതി ലഭിച്ചതിനെ തുടര്‍ന്ന് പോലീസ് കേസെടുത്തു. ദുബായ്, ഓസ്‌ട്രേലിയ എന്നിവിടങ്ങളില്‍ നിന്നാണ് കോളുകള്‍ വന്നിട്ടുള്ളതെന്ന് പോലീസ് അന്വേഷണത്തില്‍ കണ്ടെത്തിയിട്ടുണ്ട്.
ഫോണ്‍ കോളുകളില്‍ അയോധ്യ ക്ഷേത നിര്‍മാണം സംബന്ധിച്ച് പ്രതിപാദിച്ചിരുന്നു. ഇത് കൂടാതെ സ്വാതന്ത്ര്യ ദിന പരിപാടികള്‍ അലങ്കോലപ്പെടുത്താന്‍ ആവശ്യപ്പെട്ടതായും റിപ്പോര്‍ട്ടുണ്ട്. ചെങ്കോട്ടയില്‍ നടക്കുന്ന പതിവ് പരിപാടികള്‍ ഇത്തവണ നടത്താന്‍ അനുവദിക്കരുത് എന്നാണ് അജ്ഞാത ഫോണ്‍ വിളിയിലൂടെ ആവശ്യപ്പെട്ടിരിക്കുന്നത്.
അതേസമയം ലഖ്‌നൗ കൂടാതെ ദല്‍ഹിയിലെ ജനങ്ങള്‍ക്കും ഇത്തരത്തില്‍ ഫോണ്‍കോളുകള്‍ വന്നതായും പരാതി ഉയര്‍ന്നിട്ടുണ്ട്. വിഷയത്തില്‍ ദല്‍ഹി പ്രത്യേക പോലീസും അന്വേഷണം ആരംഭിച്ചിരിക്കുകയാണ്.
പ്രതികരിക്കാൻ ഇവിടെ എഴുതുക: