കോഴിക്കോട്: കോഴിക്കോട് സിവില്‍ സ്റ്റേഷനിലെ രണ്ടു ജീവനക്കാര്‍ക്ക് ആന്റിജന്‍ ടെസ്റ്റ് പോസിറ്റീവ്. ജില്ലാ മെഡിക്കല്‍ ഓഫീസിലെ ജീവനക്കാരിക്കും പിഡബ്ല്യുഡി ഇലക്ട്രിക്കല്‍ സെക്ഷനിലെ ഒരു ജീവനക്കാരനുമാണ് ടെസ്റ്റ് പോസിറ്റീവായത്. ഇന്നലെ നടത്തിയ ആന്റിജന്‍ ടെസ്റ്റിലാണ് ഫലം പോസിറ്റീവായത്.
ഇവരെ മുക്കം എഫ്എല്‍ടിസിയിലേക്ക് മാറ്റി. എന്നാല്‍ ആരോഗ്യവകുപ്പ് ഔദ്യോഗികമായി ഫലം സ്ഥിരീകരിച്ചിട്ടില്ല. ആര്‍ടിപിസിആര്‍ ടെസ്റ്റിന്റെ ഫലം കൂടി പുറത്തുവന്നാല്‍ മാത്രമെ ഔദ്യോഗികമായി രോഗം സ്ഥിരീകരിക്കൂ.
ടെസ്റ്റ് പോസിറ്റീവായതോടെ ഇവരുമായി സമ്പര്‍ക്കം പുലര്‍ത്തിയ എല്ലാ ജീവനക്കാരോടും ക്വാറന്റൈനില്‍ പോകാന്‍ ആവശ്യപ്പെട്ടു. ഓഫീസ് അണുവിമുക്തമാക്കുകയും ചെയ്തു. കോവിഡ് പ്രതിരോധ പ്രവര്‍ത്തനങ്ങളുടെ ഭാഗമായി സിവില്‍ സ്റ്റേഷന്‍ ജീവനക്കാര്‍ക്ക് നടത്തിയ പരിശോധനയിലാണ് രോഗം സ്ഥിരീകരിച്ചത്.
വിവിധ വകുപ്പുകളില്‍ നിന്നായി 350 ജീവനക്കാര്‍ ആന്റിജന്‍ പരിശോധനയില്‍ പങ്കെടുത്തു. രാവിലെ 10 മുതല്‍ ഉച്ചയ്‌ക്ക് ഒരു മണി വരെയായിരുന്നു പരിശോധന.
പ്രതികരിക്കാൻ ഇവിടെ എഴുതുക: