ബെര്‍ലിന്‍: നിലവിലെ ജേതാക്കളായ ബയേണ്‍ മ്യൂണിക്കിന് തുടര്‍ച്ചയായ എട്ടാം ബുന്ദസ്‌ലിഗ കിരീടം ഒരു വിജയം അരികെ. അലയന്‍സ് അരീനയിലെ പോരാട്ടത്തില്‍ ബൊറൂസിയ ഗ്ലാഡ്ബാക്കിനെ ഒന്നിനെതിരെ രണ്ട് ഗോളുകള്‍ക്ക് തോല്‍പ്പിച്ചതോടെയാണ് ബയേണിന് കിരീടം തൊട്ടരികിലായത്.
ഈ വിജയത്തോടെ ബയേണ്‍ മുപ്പത്തിയൊന്ന് മത്സരങ്ങളില്‍ 73 പോയിന്റുമായി ഒന്നാം സ്ഥാനത്ത് തുടരുകയാണ്. രണ്ടാം സ്ഥാനത്തുള്ള ബൊറൂസിയ ഡോര്‍ട്ട്മുണ്ട് ബയേണിനെക്കാള്‍ ഏഴു പോയിന്റിന് പിന്നിലാണ്. ചൊവ്വാഴ്ച വെര്‍ഡര്‍ ബ്രെമനെതിരായ മത്സരത്തില്‍ വിജയിച്ചാല്‍ ബയേണിന് തുടര്‍ച്ചയായ എട്ടാം കിരീടം ഉറപ്പാകും.
സസ്‌പെന്‍ഡ് ചെയ്യപ്പെട്ട റോബര്‍ട്ട് ലെവന്‍ഡോസ്‌കി, തോമസ് മുള്ളര്‍ എന്നിവരെ കൂടാതെയാണ് ബയേണ്‍ ഇന്നലെ കളത്തിലിറങ്ങിയത്. ഇരുപത്തിയാറാം മിനിറ്റില്‍ ജോഷ്വ ബയേണിനെ മുന്നിലെത്തിച്ചു. മുപ്പത്തിയേഴാം മിനിറ്റില്‍ ബെഞ്ചമിന്‍ പാവാര്‍ഡ് സെല്‍ഫ് ഗോള്‍ വഴങ്ങിയതോടെ ബൊറൂസിയ ഗ്ലാഡ്ബാക്ക് ബയേണിനൊപ്പം എത്തി. എന്നാല്‍ അവസാന നിമിഷങ്ങളില്‍ ലിയോണ്‍ ഗോറേറ്റ്‌സ്‌ക നിര്‍ണായക ഗോള്‍ നേടി ബയേണിന് വിജയം സമ്മാനിച്ചു.
പ്രതികരിക്കാൻ ഇവിടെ എഴുതുക: