കായലിൽ നിന്ന് വലയിൽ കുടുങ്ങി തോക്ക് ലഭിച്ചു

കരുനാഗപ്പള്ളി: കായലിൽ വലയിട്ടപ്പോൾ കുടുങ്ങിയത് തോക്ക്. കന്നേറ്റി കായലിൽ മീൻപിടിക്കുന്നതിനായി ഇട്ട വലയിലാണ് പഴകിദ്രവിച്ച തോക്ക് ലഭിച്ചത്.  വെള്ളിയാഴ്ച വൈകിട്ട് കന്നേറ്റി പാലത്തിന് സമീപത്ത് നിന്നാണ് വലയിൽ തോക്ക് ലഭിച്ചത്.  

തോക്ക് കരുനാഗപ്പള്ളി പോലീസിന് കൈമാറി.  ഏറെ പഴക്കമുള്ളതും തുരുമ്പിച്ച് നശിച്ചതുമായ തോക്കാണ് കണ്ടെത്തിയത്.  യഥാർത്ഥ തോക്കാണോ കളിത്തോക്കാണോ എന്ന് വ്യക്തമായിട്ടില്ല. തോക്ക് വിദഗ്ധ പരിശോധനയ്‌ക്ക് അയക്കുമെന്ന് പോലീസ് അറിയിച്ചു.

യഥാർത്ഥ തോക്കാണെന്ന് വ്യക്തമായാൽ ഇത് സംബന്ധിച്ച് കൂടുതൽ അന്വേഷണം നടത്തുമെന്നും പോലീസ് പറഞ്ഞു.