റഷ്യന്‍ സംഘം ഇന്നെത്തും

കാക്കനാട്: റഷ്യയില്‍ നിന്നെത്തുന്ന 50 പേരുടെ യുവ പ്രതിനിധി സംഘത്തിന് യുവജനക്ഷേമ ബോര്‍ഡിന്റെ നേതൃത്വത്തില്‍ സ്വീകരണം നല്‍കും. ഇന്ന് രാത്രി 9.30ന് സംഘം നെടുമ്പാശേരി വിമാനത്താവളത്തിലെത്തും. സാംസ്‌കാരിക വിനിമയ പരിപാടിയുടെ ഭാഗമായാണിത്. നാളെ കേരള ഫിഷറീസ് സര്‍വകലാശാലയില്‍ നടക്കുന്ന യൂത്ത് ഫോറത്തില്‍ പങ്കെടുക്കും. വൈകിട്ട് ഫോര്‍ട്ട്കൊച്ചിയില്‍ സാംസ്‌കാരിക പരിപാടി. 15ന് കണ്ണന്‍കുളങ്ങര ഗവ. ആയുര്‍വേദ കോളേജിലെത്തുന്ന സംഘം എന്‍എസ്എസ് വോളന്റിയേഴ്സുമായി ആശയവിനിമയം നടത്തും. ഡച്ച് പാലസും തൃപ്പൂണിത്തുറ ഹില്‍ പാലസും സന്ദര്‍ശിക്കും. 16 ന് സംഘം ആലപ്പുഴയ്‌ക്ക് പോകുമെന്ന് ജില്ല യൂത്ത് പ്രോഗ്രാം ഓഫീസര്‍ ശ്രീകല അറിയിച്ചു.